Pluh ka Karkhana pynmih tusok ha Byrnihat : Julor da ki phew Klur

Ha kawei ka jingjia pluhding kaba shyrkhei, kawei ka Karkhana pynmih tusok (matress) ka la shah bam duh khait ha ki pliah ding kaba la jia tang namar ka jingthut ka bording lane short circuit ha ki bynta jong ka mashin ot ia ki tusok.
Kane ka jingjia pluhding kaba shyrkhei ka la jia ha ka Karkhana pynmih tusok kaba la tip kyrteng kum ka Ummadat Foam Industries kaba la dei trai da u Adarsh Jujunwala kaba don ha Amjok ha ka thaiñ Byrnihat bad ka jingjia pluhding ka la jia ha ki por 2:30 haduh 3 baje eiei nohphai sngi katba ki nongtrei katei ka kompani ki dang shu ia dep bamja sngi.
Katkum ka khubor ba iohlum, la iathuh, ba ka ding kaba shyrkhei bha ka la klang ha katei ka Karkhana pynmih tusok hadien ka jingthut jong ka kor kaba ot ia ki tusok, ha kaba mar mar ki nongtrei katei ka Karkhana ki la pyrshang ban tem ia ka ding hynrei kim shem la lah shuh na ka jingklang jong ka ding ha kaba la pyntip ruh marmar sha ki pulit ka Byrnihat Police Outpost bad ki bor pulit pynlip ding bad tang hadien katto katne por ki la lah ban poi ha katei ka jaka ban tem ia ka ding.
La iathuh ruh, ba namar ka jingkhlain jong ka ding, ki bor pulit na Assam ruh ki la poi ha katei ka jaka ban iarap ban tem ia ka ding bad hadien katto katne kynta la lah ban tem ia ka ding hynrei ka jingduhnong ka la kot sha ka palat phew Klur tyngka na ka jingshah bam duh jong katei ka karkhana pynmih tusok, hynrei kam shem la don kano kano ka khubor halor ki jingjia ba sngewsih pyrshah ia ki riew paidbah namar la lah ban tem noh ia ka ding.
Na ka liang u Bah Raju Jyrwa Rangbah Shnong ka Amjok, u la ai khublei kyrpang ia ki bor pulit na Byrnihat bad ki bor pulit pynlip ding na Meghalaya bad Assam kiba la kloi ban poi bad ban tem ia ka jingklang jong ka ding ha katei ka karkhana pynmih tusok ban iada na ka jingpur jong ka ding sha kiwei kiwei ki bynta ba don marjan bad kane ka karkhana kumba la jia teng ha ki snem kiba la leit noh.