Pyllait u Conrad ïa ki tiar ai jinghikai na ka bynta ki nongai jingsumar

U Myntri Rangbah ka jylla Conrad K Sangma hynne ka sngi u la pyllait paidbah ia ka Early Child Development Framework bad ia ka ECD Content kiba dei ki tiar ai jinghikai na ka bynta ki nongai jingsumar ha ka jylla. Ha kane ka jingialang la donlang ki ophisar na ka tnad Social Welfare jong ka sorkar jylla bad ka Sesame Workshop kaba la iatreilang bad ka sorkar jylla halor kane ka sienjam. “Shibun ka jingwad bniah kala ïaid ha kine ki shisnem shiteng ha kaba pynwandur ïa ki mat ba kongsan jong ka ECD, kiba la shna kyrpang na ka bynta ka jylla bad ka jingsngewthuh ia ki jingeh ha ka thain haba pyndonkam ia ka kolshor, jingtip bad ki rukom treikam kiba la don lypa bad ba lah pyniadei bad ka jinglong ki khynnah, ki nonghikai bad ki kmie ki kpa” la ong u Conrad haba kren ha ka jingialang.

Ula ong, ka sienjam kaba kongsan na ka bynta ka jingpyntreikam bad jingmut ba ki rukom treikam jong ki tnad treikam kiba la don lypa kin don bynta lang ban pynurlong ia kata ka thong kaba kham heh jong ka ECD. U Conrad ula ong ba kane ka prokram kala khring bha ym tang hapoh ka ri hynrei wat na ka dewbah South East Asia bad kane ka lah ban long ka lad ban wanrah ia ka jingkylla kaba khraw bad ka nuksa ia kiwei pat ba kin bud lem.

Ula ong ruh ba ka long kaba donkam ban pynrung ha ka jingsngewthuh jong ki paidbah ia ka jinglehkhuid, ka jingburom ia ka mariang, ka mynsiem ieid ri bad ban long u nongshong shnong kiba don ka jingkitkhlieh bad ia kine dei ruh ban pynrung ha ki bynta jong ka pule puthi. Ula kren ruh shaphang ki prokram ki bapher jong ka sorkar jylla kiba la pynleit jingmut ha ki riewshimet bad ki nongioh jingmyntoi.