Kob u Bah Metbah ban thaw EC ha baroh 2 tylli ki District Council

Ka United Democratic Party (UDP) hynne ka sngi kala pynbna biang sa ia 4 ngut ki kyrteng jong ki kyrtong ki ban iakhun haka ilekshon MDC sha KHADC bad JHADC. Ki kyrtong haka ilekshon MDC sha KHADC ki kynthup u Bah Synshar Kupar Roy Lyngdoh Thabah- Sohïong, u Bah Anthony Khongwang- Nongshken Constituency bad u Bah Lee Trevor S Bareh- Jirang Constituency bad na JHADC u Bah Meiowan Pasi- Nangbah Mihmyntdu constituency.La pynslem ïa kine ki kyrtong da President ka UDP u Bah Metbah Lyngdoh haka jingdon lang u Bah Titostarwell Chyne, Jemino Mawthoh, u Bah Beyondstar Kurbah lem bad kiwei kiwei de. Haduh mynta, ka UDP kala pynbna ia 22 ngut ki kyrtong sha ka elekshon ha KHADC bad 17 ngut jong ka JHADC.

Haba kren sha ki lad pathai khubor u President ka UDP, u Bah Metbah Lyngdoh u la kam ba ka party kan sa pynkyndit ia baroh ha ka ilekshon ban wan sha ki artylli ki Autonomous District Council (ADC) ka Ri-lum Khasi bad Jaintia, ka ban long la 21 tarik Rymphang.“Ai ba ngan kular ha phi ba ha kane ka kynti ka long kaba phylla ba ngi la ioh ia ki kyrtong kiba biang bha bad ngin sa ioh ia ka jingiakhun kaba itynnad bad kan sa pynkyndit ruh ia baroh” la ong u Bah Metbah. U Bah Metbah u la pyntip ba ka party kala trei shitom ban pynthikna ba kan ioh thaw ia ki Executive Committee ba thymmai ha KHADC bad JHADC.

“Ta ka daw ngi la bishar bha ia ki kyrtong. Kala shimpor khyndiat hynrei ngi la kren shai bha ba ki kyrtong ha kane ka kynti kim dei tang kiba shu pyndap ia ki seat ban iakhun ia ka elekshon hynrei ki dei ki kyrtong kiba biang suba na baroh ki constituency ba ngi pynieng”. U President ka UDP u la pyntip ruh ba ka thup kyrteng ba khatduh jong ki kyrtong yn sa pyllait ha kine ki shisngi arsngi ban wan.