Pynbna ka NCW ban ym pyllait jamin ïa u kurim thang lok

Ka National Commission for Women (MCW) kan pynthikna ba u kurim jong ka lanot shah thang ding, um dei ban ioh jamin na phatok.  Ia kane la pyntip ka dkhot jong ka National Commission for Women (MCW) ka Kong Delina Khongdup haba kren sha ki lad pathai khubor hadien ka jingialang bad ki Doctor ka Shillong Civil Hospital.  Ka dkhot ka NCW kong Delina Khongdup ha ryngkat ka Chairperson ka Meghalaya State Commission for Women (MSCW) kong Iamon Syiem ki la leit ban iakynduh ia kane ka Longkmie, kaba la shah sumar mynta ha Shillong Civil Hospital bad iakynduh ruh ia ki doktor ban ioh jingtip ia ka jinglong jingman kane ka longkmie. Kane ka jingjia kaba dang mih pyrthei dang shen hadien ka jinglap ki briew ba leitkai sha ka iingsah jong ka, kala jia la shibnai tam ha ka shnong Niriang kaba hap hapoh ka Thadlaskein Block, West Jaintia Hills District. Kane ka Longkmie kala don hynriew ngut ki khun. Haba iakren bad ki nongthoh khubor, ka kong Delina kala ong ba ki doktor kila pyrshang katba lah ban sumar ia kane ka longkmie, kaba la kylla lanot na ka jingshah thombor hala u kurim. “Kat kum ka ain, ngi hap ban wanrah ia baroh kiba donkti (ha ka kam) kynthup u kurim bad ki poi kha jong ka ha ka kti ka ain. U kurim ula don ha ka kti ka ain bad ngin pyrshang katba lah ban nym pynioh jamin ia u katba kane ka longkmie ka dang don hapdeng ka jingshitom ba jur” kala kular.  Ka Kong Delina Khongdup kala ong baka Commission kan iaid bad kan buddien bad ki bor ka ain haka jingtohkit ban pynthikna ban shim daki sienjam ba tyngeh pyrshah ia u kurim bad ia baha iing u kurim kiba shah kynnoh donkti ban buh rieh ia kane ka kam bymman pyrshah iaka longkmie.

Haba kylli ia ki sienjam ki ban ai jingmut da ka Committee ban pynthikna ia ka jingshngain ki kynthei hala ki jong ki Iing ki sem, kane ka dkhot ka NCW kala ong “Kumba nga ong, kan shimpor lada ngi thmu ban wanrah ia kano kano ka ain hynrei kaei kaba ngi lah ban leh mar mar ka dei ban iaid pynsngewthuh ia ki paidbah. Nga iai ban ba ka jingialap ka long kaba kongsan ban khanglad ia kum kine ki jingjia bad kum ka imlang sahlang ngi dei ban don ka jingkitkhlieh ha kaban iarap iwei ia iwei ha ki khep ba jynjat kum kine”.Naka liang u Doctor ka Shillong Civil Hospital, u Dr C Wanniang u pyntip ba ia kane ka lanot la wanrah nyngkong ha Shillong Civil ital.ital ha ka 7 tarik Risaw bad haduh 45% ka durkhmat, ka shadem bad ka ryndang kala iing ding. U kurim ula sumar ia ka naduh ka sngi ba la wankitsha hospital tad haduh ka por b aka rai ban leit phai noh sha iing ha ka 1 tarik Naiwieng. Kat kum ka jingong jong u, ka hospital ka khlem pyllait satia ia kane ka longkmie ban leit phai sha iing haba khmih ia ka jinglong jingman. “Hynrei, naba ka nongpang kala kyntait ban ai injek bad pynkhuid bad kala pynbor ban leit phai iing, kala mih la ka mih khlem ka jingpyllait jong ngi. Ngi khlem pyllait ia ka nongpang ban leit phai iing” ula pynshai.

Une u doktor ula pyntip ruh ba ia kane ka case la shim kum ka jingiing ding namar ka jingbakla namar kane ka nongpang ka khlem iathuh ia kaei kaba jia. ‘Kam shym la ong eiei hynrei nga la kyntu ia ka ba ka dei ban hap pynkhuid man ka sngi ia ka jingmong bad pynshlur ban bam bha ia ki jingbam ba bun protein ba kan ioh koit kloi” ula ong. Kat kum ka jingiathuh ka Chairperson ka MSCW Kong Iamon Syiem, ia kane ka jingjia la kam nyngkong ba kane ka longkmie kala ur hapoh ka ding “Ngi la kyntu ia ki (Pulit) ba kin tohkit biang sa shisien namar ka dei ka case shoh lok bad ba u kurim ula thang ia ka. Ngin khmih bniah ia kane ka kam” kala kular. Haba ia dei bad kane ka jingjia ka NCW ka la dep ai Suo moto.