Pynbna ka sorkar ban pyndep noh ïa ka surok Rongjeng-Mangsang-Adokgre

U Myntri Rangbah ka Jylla u Conrad K Sangma ula pynbna, ba yn shna pyndep noh ia ka surok kaba la sahteng la slem bha ka Rongjeng-Mangsang-Adokgre lyngba ka jingbei tyngka ka World Bank. U Myntri Rangbah ula pynshai ba ka jingslem ban pyndep ia kane ka project ka dei namar ka jinglong kyllain, haba ki Sorkar barim kila pan ban pyntreikam ia kane ka surok na ki artylli ki skhim kiba hap hapoh ka Ministry of DoNER bad kane ka project ba T.200 klur kala dei ban dep ha u 2020, hynrei, ka Ministry kala pynkut noh ia kawei na ki skhim namar la aplai ia ka, ha ki artylli ki bynta jong kajuh ka Ministry.

U Conrad ula kren ia katei, haba jubab ia ki jing kylli na ki paidbah ha ka CM Connect kaba long ha ka shnong Memilam, North Garo Hills ha ka Sngi Thohdieng, da kaba ong, “Ka Ministry of DoNER kala shem ba kane ka surok kadei kaba la aplai ha ki ar bynta na ki artylli ki skhim ba iapher jong kajuh ka Ministry bad kumta ia kawei na ka skhim lah hap ban pynsangeh noh” u la ong. Ula iathuh ba ha kine ki khyndiat snem bala leit, ka Sorkar kala iatreilang bad ka Ministry of DoNER bad ka Ministry of Finance ban pynthikna ban ioh shna pyndep noh ia kane ka surok kaban pyniasoh ia ka North Garo Hills bad ka East Garo Hills bad la iohpdiang ia ka jingmynjur ban pyndep noh ia ka surok, ia kaba yn sa bei tyngka da ka World Bank.

Kane ka surok kaba don ia ka jingjrong kaba 44 km kadei u budlum jong ki nongshong shnong ka thain bad kan ai jingmyntoi ia kumba 50000 ngut ki paidbah jongka Kharkutta bad Rongjeng constituency. Katba ka 22 Km ka surok kaba sdang na Rongjeng sha Nengkhram kala jan dep artad, hynrei bun ki bynta jong ka surok ki dang sahteng bad kaba jynjar bha ban leit ban wan.Ia kane ka surok la mang tyngka ha u snem 2017 ba kot haduh T.210 klur, kaba la bei tyngka da ka NLCPR bad ka NEC. Hynrei ka NEC kala weng noh ia kane ka project bad shim noh ia ka song pisa ba T.88 klur ba kala mang, kaba la pynduna ia ka mang tyngka jong ka project sha ka T.123 klur.