Pyndam noh ka MIDC ia ka jingthmu shim jaka ha Umsiang-Mawkdoh

Ka Meghalaya Industrial Development Corporation Ltd (MIDC) ka la rai ban weng noh ia ka jingthmu shim jaka ha ka thaiñ Umsiang-Mawkdoh jong ka Ri Bhoi district, ka Corporation hadien ka jingiamir jingmut ka la shim ïa ka rai ban pyndam noh ïa ka jingthmu shim jaka. Kane ka long hadien ka jingpyrshah ki kynhun sengbhalang na Ri Bhoi dangshen ia ka jingthmu shim jaka ka MIDC 200 akar ha ki thain Umsiang. Ka MIDC ka pynshai kam don ka jingthmu barieh na lyndet ban shim ia ka jaka ha ka thain Umsiang-Mawkdoh, namar ka jinglong jingman ka ka jaka ka biang ban seng karkhana ba don manjan bad ka Assam, kumta ka long kum kawei ka jaka ban thaw ki karkhana. Ka Corporation ka la pynmih ka jingpynbna ban iasoi ia ka Expression of Interest (EOI) ha ka 7 tarik u Lber, 2025, lada don kiba sngewtynnad na bynta kane ka jingthmu bad ia katei la pynbna ha ki kot khubor ha ka ktien phareng bad khasi. Hadien kane, ki don hynriew ngut kiba kwah ban iashim bynta ha kane ka jingpynkhreh.

Hynrei naduh katei ka por ka Corporation ka la ioh bun tylli ki jingwad jingtip lyngba ka RTI na ki seng bapher bapher. Katto katne ki pynpaw ia ka jing bakla bad ba ialam bakla ba la dep pyndep ia ka kam shim jaka. Ki khubor ki la saphriang ruh ba ka Corporation ka la thied jaka T.100 klur katba ka mang tyngka ba shisha ba la mynjur na ka bynta kane ka jingthmu ka long tang hapoh 5% na ka pisa ba la pyntip bakla. Ka MIDC ka la ioh katto katne ki shithi na ki kynhun bapher bapher kiba pyrshah shai ban seng karkhana ha katei ka thain, da kaba pyrshah jur ia kano kano ka jingpynroi.

Kumta ka Corporation ka sngew ba ka long kaba bha eh ban weng noh ïa kane ka jingshim jaka lada kam lah ban pyndonkam ïa katei ka jaka kum ka Industrial Estate. Ka MIDC ka don ka jingangnud ba khraw na ka bynta ka roi ka par ba iaryngkat ha jylla Meghalaya bad kane ka jingthmu kyrpang kan sangeh noh, ka Corporation kan pyrshang ban wad kiwei ki lad bad ki jingthmu ban seng karkhana na bynta ka ioh ka kot bad ka lad ai kam ia ki samla.