Pyndonkam ki kompani da ki riewshimet ban pynpulom ia ka jingiakhih ka MCTODA

Ka jingiakhih ka Meghalaya Comercial Truck Owner and Driver Association (MCTODA) Jaiñtia Unit ban pynphai ia ki trok kit dewbilat bad clinker ba wan na ki compani pynmih bilat ka Rilum Jaiñtia ha u surok bah Mihmyntdu Khliehtyrshi, West Jaiñtia Hills mynta ka sngi ka jam sha ka sngi ba ar. Na ka liang u Ardonki Talang uwei na ki dkhot MCTODA haba ai jingkren ula ong, ka jingiakhih jong ki haduh mynta ka sngi ka dang iaid bteng ryngkat ka jingbur ryntih ia ki kyndon ka sorkar, hynrei hapdeng kane ka jingiakhih ki trai trok bad nongniah trok na ka liang ki kompani pynmih dewbilat ki la pyndonkam da ki riew shimet ne ki riew khwan myntoi ban pynpait pynpra ia ka jingiatylli ka seng.

U la ong ki Kompani pynmih dewbilat naduh mynshwa ki la wad lad ban pynpait pynpra ia ka Association ha Ri lum Jaiñtia tang ban ioh kamai ki kali lajong, namar kumba long mynta kawei kawei ka kompanni ka thied kali haduh 300, 400 tylli bad kane ka la wanrah ka jingduhnong ia ki trai ri ba don kali bad kumjh ia ki nongniah kali.

Ula iathuh ka seng ka la rai ban iakhun bad kut jingmut ban iaishah bad trei shitom ban ioh ia ki jingdawa ryngkat ka jingkyrshan kiwei ki paralok kiba sngewkhia ia ka duhnong ki trai jylla. Halor kane u bah Ardonki Talang ula kyrpad ia ki nongmihkhmat ban pyrkhat lem bad pynbeit ia kane ka jingeh ba ki kynduh bad ka dor bai kit ka dei ban long katkum ka dor sorkar.