Pynmih jingmaham ka UROFO ban iada ia ka Wah Umngi

Ka seng Umngi River Owner and Fisherman Organization (UROFO) South West Khasi Hills hynne ka sngi kala pynmih iaki kyndon ban iada iaki doh um haka Wah Umngi bad kumjuh ruh ban pynneh iaka khuid ka suba ha rud Wah. Kane kadei namar ka jingjur ka jingwan tuid ki nongkhwai bad ki nongwan shangkai pyrthei ha kane ka Wah kaba lah ban wanrah ka jingma iaka Wah Umngi. Hashuwa kane ka sngi ka Umngi River Owner and Fisherman Organisation kala leit thung iaki jingmaham (Notice) ha shi lynter ka Wah Umngi.

Ki nongialam bad ki dkhot ka Organization kila pynlong ruh ka pynkhuid iaki plastic bad tam ruh iaki bilor bad ki jaboh na shilynter ka Wah Umngi. Ka Organization ka kyntu iaki wan shangkai ne ki nong khwai ba kin lehkhuid bad kim dei ban pynpait iaki bilor ne bret pathar iaki kynja platic ha Wah lane ha rud Wah. Ki jingmaham ki kynthup, ba ym shah shuh ban siat bom ha shi lynter ka Eah Umngi, Ym shah ban pynhap jar ne ai dawai pyniap dohkha ha baroh ki thwei ka Eah Umngi, Ym shah ban khwai nar (kynpet khwai suda) bad Ym shah ban pyndonkam electric current ne battery ban tong dohkha.

Kine ki kyndon bad ki jingmaham ki treikam ruh haki wahrit kum ha Photshylla, Kynsan bad Phot Taiuh. La maham ruh ba ki nong khwai kim dei ban bret klumar iaki bilor ne plastic ha wah bad kidei ban lum ne thang noh bad lada lap iaki ba leh pyrshah yn pynshitom katkum ka ain.