Pynhiar Lama u Symbud Myntri Rangbah ia ka Jubili ksiar ka St. Peter Mawkisyiem Sohra

U Symbud Myntri Rangbah ka Jylla u Bah Prestone Tynsong bad u Myntri ka Pule Puthi u Bah Lahkmen Rymbui hynne ka sngi ki la pynhap pyrda noh ia ka jingrakhe ia ka jubili ksiar jong ka St Peter and Paul Secondary School, Mawkisyiem Sohra. U Bah Prestone haba kren ha ka jingialang, ula iaroh ia ki bor pyniaid jong ka skul kiba la lah ban ai ka jingshakri ha kine ki 50 snem ban ai jinganng jingstad ia ka shnong Mawkisyiem bad ia ki shnong kiba marjan. Ula iathuh ba ki don bun bha ki skul kiba bun da ki nonghikai ban ia ki khynnah skul bad dei na kane ka daw ba ka sorkar kala shim ia ka rai ban ong, ba kidei ban khang noh bad ula maham ia kiba kum kine ki skul ki bym kot ia ka polisi jong ka sorkar jylla bad jong ka sorkar pdeng. U Symbud Myntri Rangbah ula kynthoh kylla ruh ia ki briew kiba kynnoh ba ka kot iarap na ka bynta ki samla pule ba pynkhreh na bynta ka Matrik ka CM Impact da kaba ong, ba kiba kynthoh ki dei ban tip ba kane ka dei ka kot iarap bad kam dei satia kata ka kot pule bad ula kyntu ruh ia ki paidbah bad ki kmie ki kpa ba kidei ban sngewthuh bad kim dei ban shah ialam bakla namar ba ia kane ka kot iarap la pynkhreh da kaba leh sani bad bishar bniah bha da ka MBOSE.

U Bah Prestone ula ong, ba lah ïohi ba don bun bha ki skul ha nongkyndong kiba leh bha la ka long ha ka jingbun ki khynnah skul lane ha ka jingdon ki khynnah kiba pass bha hynrei ka sorkar kam lah ban ai ia ki jingiarap ba donkam, hynrei ki don pat ki skul kiba ym lah ban leh bha hynrei teng teng ki ioh pat ia ki jingmyntoi. Ula ong ba ka sorkar kan sa shong ban bishar bha ia katei ka bynta, kumta ia ki skul kiba trei bha kum kane ka skul, la ka long ha ka jingbun ki khynnah, ka jingdon kiba pass, kumta ka sorkar kan ia don ryngkat bad kiba kum kine ki skul. U Myntri ka pule puthi u Bah Lahkmen Rymbui ula ong ba ka sorkar MDA ha kine ki 7 snem tam kala pyrshang borbah ban pynjanai bad pynbha shuh ia ka pule puthi ha ka jylla baroh kawei bad mynta ki kam ki dang iaid shakhmat. Kum shibynta jong ka jingrakhe la pyllait ia ka kot sah jingkynmaw ne souvenir, ka jingot ia u Cake bad la pyniphuh iphieng ia kane ka jingrakhe da ki jingrwai bad ki jingshad kiba la iashimbynta da ki khynnah skul.

Nalor kane la pynkup burom ruh ia ka Sister Provincial ka Sister Smitha SD kaba la rakhe lang ia ka jingdap 50 snem ka jinglong riewniam. Ha kane ka jingrakhe ia ka jingdap 50 snem jong ka skul, la iadonlang u MLA ka Shella u Bah Balajiedkupar Synrem, u MLA ka Sohra u Bah Gavin Mylliem, u MDC ka Sohra u Bah Titosstar Well Chyne, ki nongpyniaid, nonghikai, ki khynnah skul kiba rim bad kiba mynta bad kiwei kiwei.