Pynïasoh UDP palat spah ngut ki nongïalam na kiwei ki party

Mawkyrwat, Rymphang : Ka United Democratic Party (UDP) Mawkyrwat Circle mynta ka sngi ka la pynlong ia ka jingialang paitbah ha ophis treikam jong ka ha Mawkyrwat ha kaba da ki spah ngut ki nongialam bad ki nongkyrshan na ki party bapher bapher kynthup ia ka Trinamool Congress, HSPDP, Congress bad NPP ki la wan ban pyniasoh bad ka party da ka jingthmu ban kyrshan ia u kyrtong ka UDP ha kane ka elekshon MDC ban wan, u Bah Jeslanroy Nongsiej.

Ia kine ki riew thymmai kiba kynthup ia ki nongialam bad ki nongkyrshan jong kiwei pat ki paryt la pdiang sngewbha sha ka party da u Working President jong ka UDP Seng Kmie, u Bah Renikton L. Tongkhar uba long ruh u MLA ka Mawkyrwat Constituency ha ryngkat ka jingdonlang u President ka UDP Mawkyrwat Circle, u Bah Shainkor Nongsiej, u kyrtong MDC u bah Jeslanroy Nongsiej nalor kiwei kiwei ki nongialam.

Haba kren ha kane ka sngi, u bah Renik u la pynpaw ia ka jingkyrmen kaba skhem ba lyngba ka jingwan pyniasoh jong ki nongialam bad ki nongkyrshan na ki party ba ialeh pyrshah, u Bah Jeslanroy mynta ka kynti u don ia ka jingkyrmen kaba shem ban jop ia kane ka ilekshon bad khlem artatien ka UDP kan sa thaw histori kum ka party kaba nyngkong eh ban jop ha baroh ar tylli ki elekshon, kata, ka ilekshon MLA bad MDC namar ym pat ju don kano kano ka party kaba la leh kumta ha Mawkyrwat.

U bah Renik u la khot ruh ia ki nongwan pyniasoh thymmai ba kim dei ban sngew pher hynrei ban trei shitom bad iasngewthuih jingmut hapoh ka party da kaba ia trei shitom lang ryngkat ki nongialam jong ki primary unit kiba don ha ki shnong bapher bapher khnang ba kin lah ban pynkhlain ia ka party bad ban pynthikna ba ka party kan ioh ia ka jingjop ha kane ka elekshon MDC kjaban wan.

Na ka liang jong u kyrtong ka UDP na Mawkyrwat Constituency, u bah Jeslanroy Nongsiej u la kular ba lada ki paidbah ka Mawkyrwat Constituency kin jied ia u kum u MDC un iatrei lang bad u MLA ha kaban wanrah ia ki kam pynroi bapher bapher sha ki paidbah ka thain Mawkyrwat. U la ong ruh ba ki jingthmu ba kongsan jong u ban iakhun ia ka ilekshon MDC ka long ban iada ia ka riti dustur jong ki Khasi bad ban pynkhlain ia ki Dorbar Shnong.