Pynieng ka seng Khasi 41 ki Mawbynbna ha Lum Sohpetbneng

U Lat ka jylla ka Meghalaya u Chandrashekhar H. Vijayashankar hynne ka sngi, u la leit ban sakhi ia ka jingthung mawbynna ka Seng Khasi-Sein Raij ha u lum sohpetbneng. Ia kane ka prokram la pyllong da ka Seng Khasi Sein Raij kum shi bynta jong ka jingrakhe ia ka jingdap 125 snem ka Seng Khasi Kmie ha kaba la wan sakhi lang da Symbud Myntri Rangbah ka jylla u bah Prestone Tynsong, u Myntri ka tnad Lariti bah Sanbor Shullai, u Myntri ka tnad pule puthi bah Lahkmen Rymbui bad ki nongialam ka Seng Khasi-Sein Raij bad ki paidbah kiba don ha ka niam tynrai.

Ha shwa ban sdang ia ka prokram, la sdang shwa da ka jingduwai phirat na ki riew tymen riewsan ka seng Khasi. Ha kane ka sngi, la thung 41 tylli ki mawbynna ha u kliar jong u Lum Sohpetbneng na ki tnad seng Khasi, Sein Raij bapher bapher ka ri Khasi-Jaintia. U Lat ka jylla haba kren ha kane ka sngi, ula iaroh ia ka Seng Khasi kaba la lah ban pynneh pynsah ia ka jinglong tynrai ha kine ki palat spah snem haduh mynta.

U Lat ula ong ba ka jingpynneh pynsah ia ka mariang ka dei ka rukom kaba la rung jylliew ha ki thied snam ka jaitbynriew Khasi kum ka lariti kum ka jingainguh ia u nongthaw. Ula kyntu ban don ka jingiatreilang ryngkat ka jingkitkhlieh ban iada ia ka spah mariang kiba don ha ka jylla Meghalaya na ka bynta ki pateng ban sa wan.