Pynjaboh ki karkhana bym shimkhia ka MSPCB bad sorkar

Da ki spah ngut ki nongshong shnong ka thaiñ Byrnihat mynta ka sngi ki la mih paidbah syndon ban pynpaw ia ka jingsngewkhia bad ban pynrem ruh ia ki bor ka sorkar jylla halor ka jingbym shimkhia ban weng ia ka jingeh na ka jingjur ka jaboh jong ka lyer namar ka jingnang jyllei ki karkhana kiba pynmih ia ki puipui kiba shyrkhei kaba la buh jingma ruh ia ka koit ka Khiah jong ki nongshong shnong.Ha kane ka jingmih paidbah na kylleng ki shnong ka thaiñ Byrnihat, la pynlong ia ka jingiaid paidbah naduh ka shnong Harlibagan ter ter shaduh Dehalbagan, ha kaba ki paidbah ki la pynpaw ia ka jingsngewkhia kaba jur lyngba ki placard ban dawa ruh na ki bor ka sorkar jylla khamtam ka tnat Meghalaya State Pollution Control Board (MSPCB) ban leh eiei noh mardor ban weng ia ka jingeh u paidbah ba ki mad namar ka jingjur ka jingjakhlia na ki tdem bad puipui ba mih na ki karkhana ha ka thaiñ Byrnihat.

Ia kane ka rally la lamkhmat ruh da u Bah Phrangsngi Syngkli, Lyngdoh Raid ka Nongkylla ha ka jingiadonlang ruh da ki Rangbah Shnong na ki Shnong ka thaiñ Byrnihat lem bad ki spah ngut ki nongshong shnong.Kumba la pynpaw da ki nongkren, ki la pynpaw ia ka jingsngewkhia kaba jur halor ka jingmynthi jong ki bor ka Sorkar jylla ban shimkhia ban weng mardor ia kane ka jingeh ba la mad da u paidbah khamtam kaba ktah ruh ia ka koit ka Khiah na ka jingdon jong ki karkhana kiba trei thurmur bad pynmih ia ka tdem puipui kaba shyrkhei kata naduh ba la dep ban pynbna ruh ba ka thaiñ Byrnihat ka dei ka thain kaba jakhlia bha namar ka jingdon bun tylli ki karkhana.

“Ka jingpynmih jong ki karkhana ia ki tdem iong ka la ktah shikatdei ia ki nongshong shnong, ki khynnah skul bad kiwei kiwei namar kane ka tdem iong ka la pynjakhlia ruh wat ia ki umbam Umdih bad pynjakhlia ruh ia ki iing ki sem, don ruh bun na ki nongshong shnong kiba la ngat ia ki jingpang kum ka Asthma, TB bad Cancer tang namar ba ring mynsiem ia ka tdem puipui iong kaba mih na ki karkhana”, pynpaw ki nongkren. Shuh shuh ruh, ki la ong ba na ka liang ki paidbah ki la dawa ba ka sorkar jylla kan shimkhia noh mardor ban weng ia kane ka jingeh u paidbah kaba la ktah ruh wat ia ka koit ka Khiah ki paidbah, bad lada ka sorkar kan dang mynthi bad kuman halor kane ka jingeh u paidbah, na ka liang ki nongshong shnong lem bad ki Dorbar Shnong kim banse ban shim da ki lad kiba tyngeh da kaba leit khang tala ia ki karkhana bapher bapher.