Pynkhyllem ki paidbah ia ki post ilektrik ka Assam ha Maikhuli

:Ka jingiapynibor ba jur ka la mih ha ka shnong Maikhuli, Ri Bhoi District hadien ba ki paidbah ki la pynkhyllem ia ki post ilektrik ba wan thung be-ain ki bor ka Assam State Electricity Board (ASEB). Ka jingpynkhyllem ia ki post ilektrik ka Assam ka la mih ka jingiakynad bad pynibor hapdeng ki nongshong shnong ka Maikhuli, Meghalaya bad ki paidbah na Assam hadien ka jingthmu ia pynbeit halor ka jingwan sieh beaiñ ia ki post bording da ka Assam hajan ka pung ri dohkha ka shnong Maikhuli.

Katkum ki khubor, ki paidbah ka shnong Maikhuli ki la leit mynstep ban pynkhyllem ia kitei ki post ilektrik ba pynieng ka ASEB hajan ka pung Maikhuli, hynrei hadien ba ki la dep, ki la leit phai noh sha la ki jong ki iing, hynrei ki nongshong shnong na ka jylla Assam ki la wad ia ki briew ba donkti pynkhyllem ia kitei ki post, ha kaba ka la mih ka jingiania haduh u pud ban ia pynibor hapdeng ki nongshong shnong na ki ar jylla ha khappud Meghalaya bad Assam.

Ha katei ka jingjia, ki longkmie na Maikhuli ki la kynnoh ba ki la shah kynrup ha ki briew na Assam, haduh ba ki jain phong jong ki la jot, ha ryngkat ka jingshah shoh jong ki shynrang bad ki kynthei. Hadien ba la ioh jingtip halor kane ka jingjia, ki bor District na Meghalaya bad Assam kynthup ki bor pulit ki la poi marmar sha katei ka jaka bad la lah ban tem noh ia ka jingiakynad bad ban pynpra ia ki paidbah. Na ka liang ki bor District jong ki ar jylla ki la rai ban thaw noh da ka Peace Committee, khnang ban pynneh ia ka suk ka sain bad ka jingiatreilang hapdeng ki paidbah kiba shong ba sah ha katei ka jaka khappud kawei na ki jaka kiba don hapdeng ka jingkynad hapdeng ka Meghalaya bad Assam.