Pynkup burom ka DS Lum Nongthymmai ia u Bah Sosthenes kum u MDC thymmai

Da ka jingkmen bad ka jingsngew sarong halor ka jingjop don burom jong u Bah Sosthenes Sohtun kum u MDC ba thymmai na Jirang Constituency, na ka liang ka Dorbar Shnong Lum Nongthymmai, Byrnihat ka la pynlong da ka prokra pynkup burom bad ban pynpaw ia ka jingsarong ba kum u nongshong shnong ula jop ban kit ia ka lyngkor sa kum u MDC ka Constituency. Ia u Bah Sosthenes Sohtun u ba dei ruh u MLA ka Jirang Constituency bad mynta u ba jop pat kum u MDC ha ka election kaba dang shu dep la pynkup burom ia u da ki nongialam shnong ka Lum Nongthymmai da ka jingiadonlang u Bah Iaineh Wahlang, Rangbah Shnong, u Bah Vigyan Kharkongngor President ka Seng Samla Shnong Lum Nongthymmai lem bad kiwei kiwei ki riew rangbah.

Haba kren ha kane ka sngi, u Bah Iaineh Wahlang, u la pynpaw ia ka jingkmen kaba khraw halor ka jingjop don burom jong u Bah Sohtun kum u MDC, kaba la pynpaw ba ki paidbah ka Jirang Constituency ki don ia ka jingieid jingshaniah, ha u ban tynrong sa ia ka lyngkor kum u MDC ban iasaid hapoh ka Iingdorbar jong ka KHADC, da kaba khot kyrpad ruh ba kum u MDC pat un ieng ban ai ka jingshakri kaba paka na bynta u paidbah ka dong ka thaiñ. Na ka liang u Bah Sosthenes Sohtun, u la pynpaw ia ka jingsngewnguh bad ai khublei ia ki nongialam shnong kumjuh ia ki paidbah ka Lum Nongthymmai, kiba la kynmaw ia u da kaba leh burom kyrpang, kumjuh ruh u la pynpaw ba u dap da ka mynsiem ka jingkmen ban shakri ia ki paidbah bad ka Constituency kumba u paidbah hi u don ka jingshaniah ha u.

Shuh shuh ruh, u la pynpaw ba kumba u la khlei paidbah ia ki nongrim ban ieng ialeh ha ka election MDC, kumta un ieng ban ai ka jingshakri na bynta ka bit ka biang bad ka roi ka par jong ka Constituency hi baroh kawei. Ha kane ka jingleh burom ia u Bah Sohtun, la sakhi ia ka jingiashimbynta ki khun samla bad ki heprit ban pyniphuh iphieng ia ka program lyngba ki jingrwai bad jingshad ha kaba sakhi ruh ba u Bah Sosthenes Sohtun u la ieng na la ka shuki ban shad lang bad i wei i heprit.