Iakynduh u Conrad ia ki nongialam KSU

U Myntri Rangbah ka jylla u Conrad K. Sangma ula iakynduh ia ki nongialam jongka Khasi Students Union (KSU) ban shimkhia ia ka jingsngewkhia kaba kila pynpaw ha kaba iadei bad ka Meghalaya State Investment Promotion & Facilitation Act, 2024. Ha kane ka jingialang bad ki nongialam ka seng KSU, la iadonlang u Symbud Myntri Rangbah ka Jylla u Bah Prestone Tynsong uba khmih ka kam pohiing ka jylla. Katkum ka kyrwoh na ka ophis treikam u Myntri Rangbah ka Jylla, la pyntip ba ia ka MSIPFA, 2024 la pynlong ain ha u Lber 2024 da ka jingthmu ban kyntiew bad pynsuk ia ka jingseng kam ha Meghalaya. Halor ka jingsngewkhia kaba la kdew da ki nongshong shnong, ka sorkar kala tyrwa ban wanrah ia ka jingpynkylla ha ka ain ban pynthikna ba ka Ain kan ym pyntlot ia ki kyndon ka Meghalaya Transfer of Land (Regulation) Act, 1971 ne ban iaid lait ia ki District Council.

Ki jingtyrwa ban pynkylla ia ka ain ki kynthup ia ka jingpynthikna ba ka Act kan ym pyntlot ia kino kino ki kyndon jongka Meghalaya Land Transfer of Land (Regulation) Act, 1971, ban pynthikna ba ka Act kan ym iaid lait ia kino kino ki kyndon jong ki Autonomous District Council bad ban iada ia ka lad iohkam iohkam ki trai Jylla-90 percent na ki kam yn bhah kyrpang ha ki kyrdan Non-Managerial ki bym dei ha ka kyrdan ban pyniaid bad 50 percent ha ka kyrdan Managerial ne ban pyniaid ia ka kam. U Myntri Rangbah ula pyntip ba kitei ki jingtyrwa ban wanrah ia ki jingpynkylla ne Amendment kibala tyrwa kin weng ia ki jingsngewkhia jong ki nongshong shnong bad ka Act kan pynthikna ha kaban ai jingmyntoi ia ka jylla, ryngkat bad k iada ia kabha ka miat jong ki paidbah.

Ula ong ruh, ba ka Sorkar kan iai bteng ban iakren bad ki kynhun bapher, kynthup ia ki khlieh nongsynshar bad kiwei kiwei kiba donbynta lang ha ka kam, ban pynthikna ba kane ka Act kan long na ka bynta ka bha ka miat jongki paidbah bad pynthikna ban ai iaka jingiada ba pura ia ka hok jong ki trai ri trai muluk. “Kum ka sorkar, ngi iengskhem na ka bynta ka bha ka miat jong ki paidbah. Ka jingthmu ka jong ngi ka long ban pynthikna ba lyngba kane ka Investment Act, ngin lah ban khring ia ka jingwan seng kam, kaban plie lad ban iohkam iohjam ia ki briew ki jong ngi bad bna pynthikna ba kan don ka roi ka par ha ka jylla” la ong u Myntri Rangbah.