Pynkup burom ka NPWF ia ki longkmie ha ka sngi rakhe ‘Mother Day’

Ka National People Women Front (NPWF) ka Meghalaya State Unit, ha ka sngi Saitjain ka la rakhe ia ka ‘Mother Day’ ne ka sngi Ki Kmie ha Khasi-Jaintia, ha ka jingshisha ka dei 11 tarik u Jymmang hynrei namar ka dei sngi u Blei, kumta ki la pynlong ia ka jingrakhe burom ha ka sngi Saitjain. Ka NPWF ka la rakhe ia ka sngi ki kmie ha Nongpoh ba don ka kong Rona Khymdeit kum ka MDC ka NPP, ha Pynursla ka Kong Grace Mary Kharpuri ka MDC Nongshken Constituency bad ha Jowai ka Kong Violet Lyngdoh ba dei ka MDC bad pyniasoh noh ia lade sha ka NPP.

Ha Nongpoh la pynlong ia ka jingialang ha Parish Hall Nongpoh bad u MLA ka Mawhati u Bah Charles Marngar u long kum u kongsan ha ka jingdonlang ka kong Jasmine Lyngdoh ka President jong ka NPWF State Meghalaya Unit, Kong Rona Khymdeit MDC ka thain bad ki nongkitkam ka party NPP. Kum shibynta ban lehkmen ha kane ka sngi khraw ka NPWF ka la pynkup burom ia ki longkmie ba trei na bynta ban kyntiew ia ka imlang sahlang kum ka dak ban ai mynsiem bad pynshlur.

Katba ha Pynursla, ka Kong Grace Mary Kharpuri MDC ka Nongshken ka long ka kongsan ha ka jingdonlang  u Bah Rahbok Tynsong bad ki nongkitkam ka party ban pynkup burom  ia ki longkmie kiba la noh synniang ha ka imlang sahlang. Kumjuh Katba ha Jowai u Bah Wailad Miki Shylla ula long u kongsan ban pynkup burom ia ki spah ngut ki longkmie ha ka jingdonlang ki nongkitkam party.