Pynkup burom ka sorkar ia ki pulit ba khur takma ksiar na America

U Symbud Myntri Rangbah ka Jylla uba khmih ia ka kam pohiing u Bah Prestone Tynsong bad u Myntri ka kam ialehkai u Bah Shakliar Warjri hynne ka sngi ki la pynkup burom ia ar ngut ki ophisar pulit kynthup ia u Bah Alan Marbaniang bad Wandalin Syiemiong halor ka jingioh ia ka takma ksiar ha ka World Police & Fire Games 2025 kaba la long ha Birmingham, Alabama jong ka ri America. Ka World Police & Fire Games kadei ka jingiakob kaba kongsan ha kaba ki ophisar pulit na kylleng ki ri ki wan ban iashimbyntalang ha ki jingiakob ialehkai ki bapher bapher.

Ha kane ka jingpynkup burom la iadonlang u Chief Secretary ka jylla u Bah DP Wahlang, ka Director General of Police ka jylla ka Kong I Nongrang, ki heh ophisar bad ki heh pulit bad kiwei kiwei Haba kren ha ka jingialang u Bah Prestone Tynsong ula iaroh ia kitei ki arngut ki ophisar pulit kiba la trei met bad mynsiem ban ioh khur ia ka jingjop kaba long ka jingsngewsarong ia ka jylla Meghalaya bad ula ong ba kane ka jingjop jong kine ki ophisar pulit ka long ruh kum ka jingai mynsiem ia ka tnad pulit baroh kawei bad wat ia ki nongialehkai ka jylla Meghalaya.

Na ka liang u Bah Shakliar Warjri ula ai khublei ia kine ki arngut ki ophisar kiba trei shitom ban ioh khur ia ki takma ksiar ha ka jingiakob ialehkai jongka World Police & Fire Games 2025.Ula ong ba ka sorkar jylla ka iengskhem ha kaban kyntiew ia ka kam ialehkai na ka bynta ki briew kiba don ha ki uniphom bad kan iai bteng ban bei tyngka na ka bynta ban ai ia ki jinghikai pyntbit bad ruh ban pynbiang ia ki jingdonkam jong ki nongialehkai.