Pynkup burom ka SSD ia ki samla pule ba wan shakhmat ha ki jingpule

Ka Seng Samla Dangar ha ka sngi Saitjain kala pynlong ia ka Academic Excellence Award 2025 ha kaba la pynkup burom ia 8 ngut ki samla kiba la pass bha ha ka eksamin SSLC bad HSSLC kum shi bynta ban pynshlur ia kiwei pat ki samla jong ka shong ba kin ialeh bha ia ki eksamin ki jongki. Ia kane ka jingpynkup burom ia ki samla pule la pynlong ha Community Facility Centre, Dangar ha kaba u Bah Himalaya M Shangpliang u ba dei u nongaibuit ka tnad pule puthi ka jylla ula long kum u kongsan bad la ia donlang u Rangbah Shnong u Bah HS Syiemlieh bad kiwei  kiwei de ki riew rangbah jong ka shnong, ki nonghikai skul lem bad ki kmie ki kpa.Haba kren ha ka jingialang u Bah HS Syiemlieh ula pynpaw ba u dap da ka jingkmen ia kane ka sienjam ba la shim da ka seng samla ban pynlong ia kum kane ka program ha ka sien ba nyngkong eh bad kane ka jingleh ka seng samla kala leh ia kaba bha ban ai mynsiem ia ki samla pule jong ka shnong ka thaw.

Ula ong, ki khun samla jong ka shnong Dangar kiba la leh bha ha ka eksamin SSLC bad HSSLC kidei hok ban ioh ia kane ka khusnam bad ula pynpaw ruh ba kiba bun ki kmie ki kpa kidei kiba duk bad kiba duna ha ka ioh ka kot hynrei ki angnud bad thrang bha ban pynnang pynstad ia la ki jong ki khun ki kti da kaba ki leit bylla thohdieng tang ban ioh phah skul ia la ki khun.Katba u Bah T Kharraswai uba dei u nonghikai, ula sneng la kraw ia ki khynnah skul bad kren ruh halor ki dak thoh Khasi bad pynpaw ruh ka jingkyrmen ba ka ktien Khasi kan ioh rung noh ha ka khyrnit ba phra jong ka riti synshar ka ri India.Na ka liang u Bah HM Shangpliang ula ai khublei ia ka Seng Samla Dangar kaba la shim ia kane ka sienjam ban nang pynshlur bad ai mynsiem ia ki samla pule lynga kane ka Academic Excellence Award 2025 bad ula pynpaw ruh, ba ka sorkar hapoh ka jingialam jong ka National People Part (NPP) mynta u snem ka la wanrah ia ka jingkylla ha ka tnad pule puthi bad bynrap ruh ba mynta u snem ki khun samla ki la pass bha bad ula ai khublei ruh ia ki nonghikai skul kiba la ia trei shitom.

Ula ong, ba ki kmie ki kpa ki donkam ban ia don bynta ha la ki iing ki sem ban peit ia ki khun ki kti ba kin trei shitom bad kumjuh ruh ki nonghikai skul kiba long kum ki kmie ki kpa ba-ar. U Bah Shangpliang ula ong ba ha ka thain khappud, ki don shibun ki kmie ki kpa ki bym nang bym stad ialade hynrei ki sngewthuh ia ka jingkordor ka pule puthi, kumta ki trei shitom tang ban ioh pynnang pynstad ia ki khun ki kti.