Kyrpad u bah Sawkmie ïa u Conrad bad Bah Sniawbha ban phaikhmat lem sha ki samla kamai Rapido

U Bah P.T Sawkmie, MLA barim u kyrpad ia u myntri rangbah ka jylla u Conrad Konkal Sangma bad ia u Bah Sniawbhalang Dhar, u Transport minister ban phaikhmat lem sha ki samla kamai arshaka ne Rapido, khnang ba kine ki samla kin ieng ha la ki jong ki kjat ban  kamai kajih. “Ngi  hap ban ai jingiaroh ia kine ki samla namar dalade ki trei shitom miet la bad sngi bad ka dei ka bynta jong ka sorkar ban ia rap lem ia ki, khnang ba ka kamai ka jong ki kan biang,” ong u bah Sawkmie.

U la bynrap, “Kumba na ka liang u myntri rangbah u la plie ki lad ki lynti ia ki samla ka jylla ha kiba bun ki liang, kaba la long ka jingmyntoi kaba khraw ia ki samla, kumjuh ruh ka jingshimkhia ka sorkar ia ki samla kamai Rapido kan long shuh shuh ka jingiarap kaba khraw ia ki samla.” “Ha kine ki sngi kiba mynta ka jingkyrduh kam kyrduh jam ka jur shaba palat, kumta donkam ia ka sorkar ban shimkhia ia ki samla kiba kamai bad im ja na ki ar shaka Rapido, mamar kane ka dei kawei na ki lad aikam aijam ia ki samla ha kine ki sngi kiba mynta “ ong shuh shuh u bah Sawkmie.

Kumba shu pynkynmaw dang shen ha ka 1 tarik u Naitung, 2025 ka Ministry of Road Transport and Highways (MoRTH) ka la pyllait ia ki guideline ne ki jingbthah ban thaw ia ki kyndon na ka bynta ka sorkar jylla ban ai laisen ia ki nongkamai rapido. Ka la ong ba ki sorkar jylla ki lah ban phaidien thynmai ia kine ki guideline hapoh ka lai bnai. Ka Clause 23.1 jong ka Motor Vehicles Aggregator Guidelines ka ong, “Ka sorkar jylla ka lah ban ailad ia ka jingkamai lang ki non-transport motorcycles na ka bynta ka jingleit jingwan ki passenger,” kaba la bynrap ba kane kan iarap pynduna ia ka jingdheng kali, ka jingjaboh ka lyer, kan pynsuk ia ki paidbah nongleit nongwan bad kan long ruh ka kabu ba kin im.