U Lat ka Jylla Meghalaya u CH Vijayashankar hynne ka sngi Palei, ula pynkup burom ia ki 10 ngut kiba don jingduna ha ka dkhot met, ha ka jingialang kaba la pynlong da ka Commissioner for Persons with Disabilities, Social Welfare bad ka Lok Bhavan.
Ha kane ka jingialang la iadonlang u Principal Secretary u HC Choudhary, u Commissioner & Secretary u Pravin Bakshi, u Chief Adviser ka Meghalaya State Paralympics Association u Bah Himalaya M. Shangpliang bad kiwei kwiei.
Ki 10 ngut kiba la shah pynkup burom ha u Lat ka jylla ki kynthup ia u Ferdinand Lyngdoh Marshillong, Anjelina Tynhiang, Simseng M. Sangma, Willingson Manar, Orphon Nongrum, Shanborlang Siangshai, Madhu Subedhi, Keneddy Rynjah, Jepora T. Sangma bad Pillbert Hanse.
Haba ai jingkren, u Lat ula iaroh ia kine kiba la ioh ia ka khusnam halor ka jingdon ia ka mynsiem kaba skhem bad ka pynpaw ba kane ka jingjop ka jongki ka long kum ka jingpynkynmaw ba ka jingduna ha ka dkhot met kam dei satia ka jingdkoh hynrei ka long ka dak jongka jingkhlain bad ka jingshlur bad ula banjur ia ka jingkongsan ban ithuh ia ka daw tynrai jong ka jingduna ha ka dkhot met bad ban pynkhlain ia ki lad jingiada.
U Lat ula banjur ba katba ka jingpynkup bor bad ka jingkynthup lang ka long kaba kongsan, dei ban phaikhmat ruh ha kaban lap noh dang kloi, ban ai ki jingpynsngewthuh paidbah, ban phah sumar mardor, ka jingai ka koit ka khiah ia ki kmie bad ki khunlung, ka jingshngain ha ki surok bad ka jingiada ia ka koit ka khiah jong ki paitbah ban lah ban kiar na katei ka jingpang jong ka jingduna ha ki dkhot met bad ula kyntu ia baroh ki tnad kiba dei khmih ba kin shim ia ki sienjam bad ban iatreilang ban iada ha ryngkat bad ban ai jingsumar bad ka jingkyrshan.
Nalor kane, u Lat ula pynpaw ba ka ri India, kum ka nongiasoi bad iadonbynta bad ka United Nations Convention on the Rights of Persons with Disabilities (UNCRPD), ka iengskhem ha ka jingkular ban pynneh ia ka burom, ka hok bad ka jingiashimbynta pura jong ki briew kiba don jingduna ha ki dkhot met bad ka ong ba ka jingiaid shakhmat kaba shisha jong ka imlang sahlang kadei kaba la thew da kumno ka leh ia ki dkhot kiba shah ktah.
Ula ong, ba ka Rights of Persons with Disabilities Act, 2016 kadei u paia aiñ ba khlain ban pynthikna ia ka jingioh kaba ryngkat, ka jingioh ia ki lad bad ka jingbym shah lehbeiñ.
U Lat ula kyntu ia baroh kiba donbynta, ki tnad sorkar, ki jaka pule, ki kynhun jong ka imlang sahlang bad ki nongshong shnong ba kin iatreilang ban pynkylla ia ka mynsiem jong katei ka Aiñ sha ka jingleh kaba shisha ha madan bad ula pynshlur ia kine kiba la ioh ia ka khusnam ba kin bteng ban trei shitom ban poi sha ka thong bad ula pynthikna ba ka jylla kan iai bteng ban ai jingkyrshan ia ki.