Pynkup burom u Lat ïa u Steve Jyrwa

U Lat ka Jylla u CH Vijayashankar hynne ka sngi ula pynkup burom ia u Steve Jyrwa, u lahduh ha ka jingiakob shad kaba pawnam ha ka ri kaba la tip kum ka India’s Best Dancer Season 4 kaba la long ha Mumbai. U Lat ka jylla ula ai khublei ia u Steve Jyrwa halor ka jingjop ka jongu kaba la long ka jingsngew sarong bad ka jingithuh ia ka jylla Meghalaya ha ka rynsan hapoh ka ri. U Viajayashankar ula iaroh ia ka jingtbit bad ia ka sap ka phong  jong u Steve bad ka jingtrei shitom ka jongu kaba la long kum ka jingai mynsiem ia ki samla ka jylla bad ula pynshlur ruh ia u Steve ba yn iai bteng ban trei shitom bad ban mihkhmat ia ka ri India ha ki rynsan iakob kiba long shabar ka ri India.

U la pynpaw ba ka jingjop u Steve kan long ka jingai mynsiem ia kiwei pat ki nongshad ba kin wad ia ki lad bad ban noh synniang halor ka jingriewspah ka jylla ha kaba iadei bad ka kolshor. Nalor kane ula banjur ia ka jingkongsan ban saindur ia ka sap ka phong bad kyntu ia ki samla ka jylla ba kidei ban pynurlong ia ka jingangnud ka jongki da kaba trei shitom bad da ka jingskhem  jingmut. U Steve Jyrwa ula pynpaw ka jingsngewnguh ia ki kyntien ai mynsiem bad ka jingpynkup burom ka jong u Lat ka jylla.

Une u nongshad ba tbit ha ka ri, ula iathuh shaphang ka jingiaid lynti ka jongu ban poi syndon sha ka thong ka jingjop bad ula pynpaw ia ka jingsngewnguh ia ka jingkyrshan kaba ula ioh na ka iing ka sem, ki nonghikai bad na ki paidbah ka jylla Meghalaya.