Pynkup burom u MLA ia ki 126 ngut ki samla pule bad samla donsap ka Nongstoin

U MLA ka Nongstoiñ Constituency, Bah Gabriel Wahlang mynta ka sngi u la ai khusnam sha ki samla pule kiba la wan shakhmat ha ka pule puthi lyngba ka 3rd MLA Excellence Award 2025.Ka jingïalang kaba la long ha ka Hall jong ka Anderson Higher Secondary School ka la sakhi ïa ka jingai burom sha 126 ngut ki samla, kynthup ïa ki nongjop ba shakhmat kum ka Mesaribha Lyngdoh kaba la ioh ia ka kyrdan 14th Position ha ka eksam SSLC bad 93.50% percentage na ka Synod Higher Secondary School, Shillong bad u Born Winner Marngar uba la ioh17th Position bad ka percentage 93.00% na Anderson Higher Secondary School.Ban ai mynsiem halor ka jingtrei shitom jong ki, u MLA u la ai T. 20,000 sha kitei ki nongjop, katba ïa kiwei pat ki samla kiba la wanrah burom u la ai T. 6,000.

Nalor ka pule puthi, la ai khusnam ruh sha ki samla ba don sap ha ki liang bapher bapher kynthup ha ka shad, ka rwai, dro dur bad kiwei ki sap ba kyrpang.Ka bynta kaba khampher ha kane ka sngi ka dei haba u Banñiewkor Marbaniang, u nongdro dur uba pawkhmat na kane ka thain, u la pynkyndit ïa ka paidbah da kaba u la dro dur ïa u briew ba ym shym la ithuh, hynrei hadien ba la pyndep, katei ka dur ka la kylla long ka dur kaba shai bha jong u MLA Bah Gabriel Wahlang bad kane ka la pynlong ïa ki paidbah ban ai jingïaroh iabutei u samla.

Haba ai jingkren, u Bah Gabriel Wahlang u la kyntu ïa ki samla ba, “Ha ka jingim ki long shisha kiba eh bad ki jingtynjuh, hynrei lada phi don ka thong, phim dei ban shah tyllep ha ki jingshah pynduh mynsiem. Buh ïa ka thong ha ka dohnud, wat ju kylla noh na ka bad Wat ailad ïa kiwei ban kdat ïa ka lynti jong phi hynrei long kiba shaniah ha lade, ong u Bah Gabriel.Ha kane ka jingïalang la ïadonlang ruh u bah Garod L.S.N. Dykes, Deputy Commissioner ka West Khasi Hills District; Kong Balarina Syiem, District Sports Officer, Kong W.A. Sohklet, Principal ka Anderson Higher Secondary School nalor ki nonghikai, ki kmie ki kpa bad ki paidbah ba la wan ban sakhilang.