Pynlong ka SNSP Abhiyaan ia ki Health Camp ban ai jingsumar ei ia ki paidbah

Ka Swasth Nari Sashakt Parivar (SNSP) Abhiyaan la rakhe mynta ka sngi da kaba pynlong ïa ki Health camp ba kyrpang ha kylleng ka Jylla Meghalaya. La pynlong ia ka camp ha iew shnong kaba don ha Diengpasoh, East Khasi Hills ha ryngkat ka jingiatreilang bad ka Diengpasoh PHC bad la wan ban iashim bynta da ka kynhun jong ki doctor na NEIGRIHMS. Ha kane ka camp la sakhi ïa ka jingïashim bynta shitrhem ki paidbah ban wan sumar ban peit bniah ïa ka koit ka khiah khlem jingsiew, ki jaka pynrung kyrteng ha ka MHIS bad PMJAY ryngkat bad ki jingpynshai paidbah ban pynleit jingmut ia ka koit ka khiah jong ki longkmie bad ki kynthei.

Ka kynhun jong ki doctor ka kynthup ïa u Dr. Aldrich Lyngdoh uba dei u Medical and Health Officer In-charge jong ka Diengpasoh PHC; bad na ka NEIGRIHMS ka Dr.Thoudam Reena Devi bad ka Dr. Evakerlang S. Lynshing (Community Medicine), ka Dr. Charity Lamin (Paediatrics), Dr. Jaya (Obstetrics & Gynaecology), Dr. PynnarbhahSuting (Medicine), Dr. Oinam Somapika Devi (Ophthalmology) bad ka Kong Ophelia Mary Kharmujai (Public Health Nursing Officer).  U Dr. Aldrich Lyngdoh ba dei u Medical and Health Officer In-charge ka Diengpasoh PHC ula ong, “Kane ka prokram ka long ban iashim bynta ka shnong bad ruh ban pyni ïa ka campaign jong ka SNSP bad dei namar kane ka prokram ba ngi la lah ban pynlong ïa ka health camp ryngkat ka jingïatreilang ka NEIGHRIMS. Ngi la ïakynduh ruh ïa ki nongïalam shnong, ki Rangbah shnong ban bteng ïa ka jingai jingtip bad ban pynthikna ïa ka jingai jingtip ba iar tam bad ka jingïashim bynta lang jong ki paidbah.”

“Ka jingthmu ba kongsan jong ka SNSP ka long ban pynshlur ïa ki longkmie ban peit bniah ïa ka koit ka khiah man ka por. Mynta ka sngi, ngi don ki longkmie ba armet bad ki nongpang ba dang samla ba don jingeh ha ka jingkoit jingkhiah ban sumar ha ki bnai ban wan,” la ong ka Dr. Evakerlang Smenficia Lynshing, Community medicine doctor na NEIGHRIMS.U nongmihkhmat jong ka shnong Bah Raymond Mawthoh ula pynpaw ka jingsngewnguh ïa ki ophisar, da kaba ong, “Kane ka health camp ka long ka jingkyrkhu, ym tang ïa ki nongpang hynrei ia ka shnong ka thaw. Kum kine ki camp ki pynkynmaw ïa ki briew ban sumar ïa ka jingkoit jingkhiah ka bor pyrkhat jong ki ruh haba ka jingmut jingpyrkhat ka khlaiñ, ka kham suk ban pynleit jingmut ha ka koit ka khiah jong ka met. Ngi ai khublei ia ki doctor na PHC Diengpasoh & NEIGRIHMS bad ia ki lad pathai khubor kiba pynphriang ia ka jingtip.” Kum kine ki SNSP Abhiyaan camp la pynlong ruh ha North Garo Hills district bad ha West Garo Hills district, ha kaba la sakhi ïa ka jingïashim bynta shitrhem na ki nongshong shnong.