Pynlong ka sorkar ia ka ‘Skillerate Connecting’ ba ar sngi ha Kynshi

Ka Myntri ka koit ka khiah ka Kong Mazel Ampareen Lyngdoh bad u Myntri ka tnad Labour, Employment & Skill Development u Bah Shakliar Warjri, hynne ka sngi ki la plie ia ka Skillerate Connecting 2025, kaba ar sngi ha Kynshi Football Ground da ka Meghalaya State Skill Development Society (MSSDS) kaba hap hapoh ka Department Labour, Employment and Skill Development ka jylla.

Ia kane ka prokram la pynwandur ban pynkup bor ia ki samla da kaba thaw ia ka rynsan na ka bynta ban tei ia ka sap ka phong, ka lad iohkam iohjam bad ba kin sengkam lajong bad lyngba ka Skillerate Connect la khmih lynti ba kin don 2,000 ngut ki samla na kylleng ki District jong ka jylla ban wan iashimbynta kaban long kum ka jingpynkhlain bad jingpynkup bor ha ka jingdon sap.

Haba ai jingkren, ka Kong Ampareen Lyngdoh kala pynpaw ia ka kamram kaba kongsan jong ka MSSDS naduh ba la seng ia ka bad kala banjur ia ka mishon jong ka sorkar ban pynlong ia ka imlang sahlang ha ka jylla kaban shaniah hi halade da kaba kyntiew ia ka jingdon ia ki sap ki phong, ban kyntiew ia ka jingseng kam lajong bad ban pynmih ia ki briew kiba don ia ka sap ka phong ha ki kam bapher bad kala pynbna ruh ban buh sa 3 tylli ki Centre ha Eastern West Khasi Hills ha u snem mang ban wan.

Katba u Bah Shakliar Warjri, ula ong ba ka jingshim ia kane ka sienjam kala weng ia ka jingduna ha ka jingdonsap bad ban tei ia ka lawei kaba don ia ki briew kiba lah ban trei ia ki kam bad ula iaroh ruh ia ka MSSDS kaba la ai jinghikai ha kylleng ki district jong ka jylla.

U Myntri ula kubur ba ka jingbym donkam donjam kadei ka mat ym tang kaba ktah ia ka jylla Meghalaya hynrei ia ka pyrthei baroh kawei bad ban weng ia kane ka jingeh la sdang ia ka Skillerate Connect hapoh jong ka MSSDS ban saindur bad ban kyntiew ia ka sap bad ban ai jinghikai ha ki liang bapher bapher ia ki samla ka jylla.

Ha kane ka prokram la buh ruh ia ki 60 tylli ki dukan, kiba la pyninam ia ki mar kiba la pynmih da ki nongthain kti, ki nongseng kam lajong bad ki karkhana rit, ban kyntiew ia ka jingioh kam ialade bad ban pynskhem bad pynkhlain ia ka kamai kajih.