Pynlong ‘Mock Drill’ ka DDMA ha Mairang ban ïakhun pyrshah jingpluh ding

Ka District Disaster Management Authority (DDMA) Mairang, ha ryngkat ka jingïatreilang bad ka Tirot Sing Memorial Civil Hospital Mairang, ha ka 23 bad 24 tarik Risaw 2025 ka la ïoh ban pynlong ïa ka jingai jinghikai kaba ar sngi halor ka bynta kumno ka Hospital kan pynkhreh ne ïakhun pyrshah lada jia ka jingpluh ding bad kiwei kiwei ki jingjia. Ha kane ka jingai jinghikai kaba ar sngi bala pynlong ha Tirot Sing Memorial Civil Hospital Mairang la ïoh ruh ban ai jinghikai ka Mock Drill.Ka thong jong kane ka jinghikai ka long ban pynkhlaiñ shuh shuh ïa ka jingpynkhreh jong ka Hospital Incident Response Teams (IRTs) ban ïakhun pyrshah ïa ka nemsniew lane ïa kino kino ki jingjia kum ka jingpluh ding bad kiwei kiwei kiba lah ban jia ha Hospital. Ka jinghikai ka kynthup ruh ïa ki bynta bapher bapher kum ka Jingpynkhreh ïa ka Hospital Disaster Management Plan, ki Kamram jong ki Incident Response Teams, ka First Aid, ki rukom wad bad pynim briew (Search and Rescue Techniques) bad ki lad jingsumar pyrshah ïa ka ding / jingpyndonkam ïa ki tiar pyllipding (Fire Safety Measures / Use of Fire Extinguishers).
Ki nonghikai ha kane ka training ki kynthup ïa u Joint Director ka DHS u Dr. S. Lyngdoh, u Specialist, O/o DMHO u Dr. Robert Marak, u Station Officer, Fire & Emergency Services, Mairang u bah N. Nonglait, bad u District Disaster Management Officer, DDMA, Mairang u bah Jonathan Mawthoh. Ki Hospital IRTs na Tirot Sing Memorial Hospital, Makarios Medical Centre bad na Holy Cross Hospital, Mairang, ki la shim bynta bha ha kane ka jinghikai.
Ha ka sngi kaba khatduh, la pynlong ïa ka Mock Drill ‘on Fire Safety’ kaba dei bad ka jingjia jingpluh ding hapoh hospital ban test ïa ka jingïatreilang, ka jingpynkhreh bad ka jingkitkhlieh jong ki kynhun hospital bad ka kynhun jong ka distrik. Ïa kane ka mock drill la shim bynta da ka jingïarap jong ka Fire & Emergency Services, Mairang .U Dr. W. Shangpliang, Medical Superintendent jong ka Tirot Sing Memorial Hospital, ka la pynpaw ïa ka jingsngewnguh ïa baroh kiba la ïashim bynta halor ka jingïaid beit jong ka Mock drill. Ka la ong ruh ba ka long kaba donkam ban pynlong man ka por ïa ki mock drill kum shi bynta ban pynkhreh ïa ki hospital ban long kiba lah ban ïakhun pyrshah ïa kino kino ki jingjia nemsniew khamtam ka jingpluhding.