Pynphai ka KSU ia ki bar jylla ba wan sah be-ain ha Laban

Ka Khasi Students’ Union (KSU) Laban Circle ka la pynphai kylla ia 15 ngut ki briew ki bym dei ki trai jylla ba la sah be-aiñ khlem ki kot ki sla ne ka jingtip ka Dorbar Shnong. Kane ka la jia ha ka janmiet 23 tarik u Rymphang, 2026. La iathuh kitei ki khar muslim ki wan sah ha kawei ka iingwai ha Laban. Katkum ka jinglum jingtip ka Seng, ïa ka iingwai la ai sha ar ngut ki briew ki bym shim sah shuh shane ha ki bnai ba la dep bad kine pat ki ai pateng ha kine ki 15 ngut ban sah beaiñ khlem jingtip ki trai iing ne ioh jingbit na ka shnong.

Na ka liang ka Seng ka la kyndang mardor ïa kin a kane ka iing bad pynmih ia baroh 15 ngut bad pynkit ïa kine da ka kali sha ka jylla ba ki wan sha Assam. Katkum ka kyrwoh ka seng ka pynkynmaw sa shisien ïa baroh katkum ka jingialang ba la shong da ka Seng bad baroh 7 tylli ki Dorbar Shnong kynthup hapoh ka Rait Laban Dorbar Pyllun bad Dorbar Shnong Lawsohtun ryngkat ka jingiadon lang ki pulit ka Laban ha 5 tarik u Nailur, 2025, ka la shim ïa ka rai ba ym shah shuh ïa ki bar jylla ban ai wai iing khlem ka jingbit na ki Dorbar Shnong.

Ka KSU ka la maham ia ki trai iing ki dei ban burom ïa kane ka rai bad kim bit ban leh pyrshah ban ai wai iing sha ki bar jylla. Lada lap nangne sha khmat ki trai iing kin hap ban bah khlieh la jia ei eiei hapoh ki 8 shnong.