Pynpra ki bor District 7 ki karkhana saiñ dewiong be-aiñ ha EJH

Ki District ka East Jaintia Hills ha ka sngi Saitjain ki la leit ban pynpra haduh 7 tylli ki karkhana sain dewiong (Coke) kiba treikam be-aiñ khlem da ioh jingbit ha ka District. Katkum ka kyrwoh na u Deputy Commissioner ka East Jaintia Hills u Shivansh Awasthi (IAS) ula pyntip ba la thaw ia ka Joint Team ne ka kynhun iatreilang ban pynpra ia kitei ki karkhana Coke kiba la treikam be-aiñ. U la iathuh ka jingpyn-pra ka la long hynnin ka sngi Saitjain ryngkat ka jingiatreilang u Sub-Divisional Officer, u Manish Kumar (IAS) bad ka kynhun ba kynthup ia ki ophisar na ka Meghalaya State Pollution Control Board (MSPCB) bad ka tnad pulit bad kiwei kiwei.

U Deputy Commissioner ula ong, ia kane la leh katkum ka jingbthah ka iingbishar jong ka Meghalaya High Court bad la thaw ia ka kynhun ban iatreilang kynthup na ki tnad bapher na bynta ban pynpra ia ki karkhana coke ba tei be-ain hapoh ka District. U la iathuh ki don 16 tylli ki karkhana coke ba la tei be-ain khlem ioh jingbit ha East Jaiñtia Hills District. Na kine ki 16 tylli ki karkhana coke be-ain ki la dep pynpra 5 tylli kham mynshwa. Katba ia ki 11 tylli ki karkhana coke ba dang sah, ki la phah jingthoh naduh u bnai Risaw, 2025 sha ki trai ban ai ki kot ki sla ban ioh jingithuh ba ki dei ki karkhana kiba lah ban treikam, hynrei kim shym la jubab eiei na ki trai karkhana haduh mynta.

Halor kane u Deputy Commissioner ula iathuh ba ka kynhun ka la pyndep ia ka kam ban pynpra ia ki 7 tylli karkhana coke na ki 11 tylli kiba la tei khlem jingbit bad la iathuh katba ia ki 4 tylli ki karkhana coke la pynpra hi da ki trai.“Kumta baroh 11 tylli ki karkhana coke ba la tei khlem jingbit ha East Jaintia Hills  kim treikam shuh” ula bynrap.