Pynsangeh ‘Lucky Draw’ ka Shnong Pahamsyiem, yn pynphai pisa ia kiba thied tiket

Ka Dorbar Shnong Pahamsyiem, Nongpoh ka la mad ia ka jingsngewsih kaba khraw bad kaba la ktah ruh wat ia ka burom jong ka Shnong ka thaw tang namar ka jingshah shet kylla bad ka jinglehbuit tuh da ki katto katne ngut ki briew kiba la kular ban pyniaid iew ia ki ticket jong ka Lucky Draw kaba la thmu ban pynlehkai bad ban pynbna paidbah ha ka 24 tarik Naitung, 2025. Kumba la ioh jingtip, ka Dorbar Shnong Pahamsyiem, ka la pyniaid ia ka khalai nusib ne ka Lucky Draw da ka jingthmu ban ioh pynmih pisa ban leh ia ki kam bhalang khamtam na bynta ka shnong ka thaw, ha kaba la pynbna ba ki buskit ne ki prize ki don shibun tylli ki kali saw shaka, ki thukthuk bad scooty bad kiwei kiwei ki buskit ha kaba la pynbna ban pynlehkai nyngkong eh ha ka 23 tarik Jylliew hynrei namar bym shem la lah die bha ia ki ticket la pynkynriah pat ban pynlehkai ha ka 24 tarik Naitung 2025.

Haba kren bad ki Nongthoh Khubor, u Bah Jedwin Lyngdoh, Rangbah Shnong ka Pahamsyiem u la iathuh, ba kum ka Dorbar Shnong hi da ka mynsiem kaba khuid bad da ka jingangnud ban pynmih pisa na bynta ban pyndonkam ha ki kam bhalang jong ka shnong ka thaw ki la pyrshang ban thawlad da kaba thmu ban pynlehkai ia kane ka jingialehkai khalai nusib ne ka Lucky Draw bad ki la iaid shakhmat ban pynbna paidbah bad ruh ban die ia ki ticket da kaba shaniah ruh ha kiba bun ki riew shimet ban iarap pyndie ia ki tickets. U la iathuh ruh, ba nyngkong la rai ban pynkhalai noh ha ka 23 tarik u bnai Jylliew hynrei namar ba ka jingdie ia ki ticket ka dang duna bha bad ba kim pat iohlum lut ia ki jingkhein na kito kiba la kular ban iarap pyndie ia ki tickets kumta ki la pynjlan ia ka tarik ban pynkhalai sha ka 24 Naitung, hynrei kat nang jam sha kine ki tarik na ka liang ka Dorbar Shnong ka la pyrshang ban lum jingkhein na kito kiba la kular ban die ia ki ticket hynrei pleng kim shem la jubab shuh bad kim shem la wan pynphai ia ki ticket, ki receipt ne ka pisa tad haduh kane ka kynti.

Shuh shuh ruh u Bah Lyngdoh u la iathuh, ba halor kane ka jingjia, na ka liang ka Dorbar Shnong hi ka dap da ka jingsngewkhia kaba jur halor kane ka jingshah shet ne shah shimkabu ha kito ki briew kiba la kular ban iarap pyndie ia ki tickets wat hapdeng ka jingnang jan ka tarik ban pynkhalai, kumta da ka mynsiem kaba sngewkhia na ka liang ka la rai ban pynsangeh noh ia kane ka jingpynkhalai namar kam shem la long kumba la thmu.Ha kaba ia dei bad kito kiba la thied ia ki ticket jong kane ka Lucky Draw, u Bah Jedwin Lyngdoh kum u Rangbah Shnong u la kyrpad ia ki paidbah ka Ri Khasi Jaintia ba kim dei ban don ka mynsiem khohnioh ne diaw pyrshah ia ka jingshem jong ka Dorbar Shnong, hynrei na ka liang ka Dorbar Shnong hi ka la rai ban pynphai noh ia ka pisa jong kito kiba la thied ia ki ticket ha kaba ia ka tarik yn sa pynbna shen lyngba ki Lad Pathai Khubor bad la kyrpad ia baroh kiba la thied ia ki ticket ba kim dei ban bret ne pynjot ia ki ticket khnang ba kin ioh ban pynphai biang bad ban pdiang ia ka pisa kaba ki la thied ia ki ticket, u la bynrap.