Pynshlur u Lamphang ia ki samla ban shakri ban pynkylla ia ka lawei

Ka Law Department ka Meghalaya Legislative Assembly ka la pynlong ka jingialang hapdeng ki samla ‘Intern’ bad u Lamphang ka Ïing dorbar Thawain ka Jylla u Thomas A. Sangma bad ki dkhot ka Meghalaya Legislative Assembly (MLA) ha Assembly Building, Rilbong, Shillong Hynne ka sngi.

Ha kane ka prokram la shim bynta da u Deputy Chief Whip ka sorkar u Bah Ronnie V Lyngdoh, ki MLA kynthup ka Kong Santa Mary Shylla, Bah Charles Pyngrope bad u Bah Brightstarwell Marbaniang, u Secretary ka Assembly u Malthus S. Sangma, u Adviser (Legislation) Dr. Andrew Simons bad ki ophisar jong ka Assembly Secretariat.

La iathuh palat 60 ngut ki samla ba leh ‘Intern’ na ki 8 tylli ki kolej na kylleng ka Jylla bad na ka University Delhi ki la shim bynta ha ka prokram ban ai jingtip ba paka ia ki samla pule halor ka rukom treikam ka Ïing dorbar bad ki kam synshar paitbah.

Haba kren ha ka jingiakynduh u Lamphang ula ong, ka jingleh ‘Internship’ ka long palat ia kaba ki ioh ban pule ha ki kot bad ka long ka kabu ia ki samla pule ban sngewthuh ia ka kam synshar paitbah.

U la ong, ka Ïing dorbar thawaiñ kam dei tang ka jaka pule ha ki kot hynrei ka jaka iatai ban jingai jingmut, ki polisi treikam ban pynsngew ka jingangnud ki paitbah.

Ula bynrap ki samla ba iashim bynta ha ka kam shakri ia ki paitbah namar ki samla ki wanrah ka jingai jingmut thymmai, ki jingleh thymmai ban don bynta ha ki kam thawaiñ na bynta ka lawei ka jylla.

U Lamphang ula pynkynmaw dang shen ha Parliamentary Seminar ha Canada ba la shim bynta da ki nongthawaiñ na 90 tylli ki ri ka pyrthei, ki la kdew ka nuksa jong kawei ka kynthei ha Parliamentarian ne nongthawain ha ka rta ba dang 25 snem bad la shem ba ka ri Canada kam don ka jingbhah kyrpang ia ki kynthei ha Parliament, hynrei ki kynthei ki la don palat shiteng ka jingdon ki dkhot ba la shah jied.

Ula pynshlur ia ki samla ka Meghalaya ba kin iashim bynta ban shakri ia ki paitbah da ka jingangnud ban pynkylla ia ka lawei jong ka Jylla bad ka Ri.