Pyrshah ka shnong Wapungskur, kular ka MSPCB ban leit jingjurip

Ka Meghalaya State Pollution Control Board (MSPCB) kala kular ban pynlong ia ka jingjurip ia ka jaka ba thmu seng ia ka karkhana Coke hapoh ka shnong Thlakaru, Wapungskur, East Jaintia Hills. Ia kane la kular da u Member Secretary ka MSPCB u Bah GH Chyrmang haki Nongialam ka Wapungskur Dorbar Shnong haka jingïalang bala long ha ophis treikam ka MSPCB Shillong. Kane ka wan hadien ba ki nongialam ka Dorbar Dhnong Wapungskur East Jaintia Hills kila leit pan jingpynshai na u Member Secretary ka tnat MSPCB u Bah GH Chyrmang halor ka jingai ia ka Consent To Establish (CTE) ban seng kharkhana Coke iaka Om Om Coke hapoh ka shnong Thlukure Wahtongtiang. Katkum ka Consent to Establish (CTE), ba la pymih ha ka 7 tarik Lber 2025, la kdew ba la ai jingbit ban tei Coke Plant hapoh ka shnong Thlukuru, Mookhep East Jaintia Hills District ha ka jinglut kaba palat T.4.50 klur.  Haba kren shaki lad pathai khubor u Member Secretary, u Waheh Shnong ka Shnong Wapungskur u Bah Postling Dkhar u la ïathuh ba u Member Secretary ka MSPCB u la pyntip shaki ba la ai iaka CTE hadien ba ka ophis District Forest Officer (DFO) kala kam ba ka jaka ba thmu seng karkhana Coke, kam dei satia ka jaka khlaw.

U Bah Postling u la ong baka jingpyrshah ban seng karkhana Coke kadei ruh namar baka shnong Mookhep bad u Doloi ka Elaka Jowai kila ai No Objection Certificate (NoC) khlem da kynjoh ktien iaka Dorbar Shnong Wapungskur. U la ong ba ka jaka ba thmu ban seng iaka karkhana Coke ka dang dei hapoh u pud u sam jong ka shnong Wapungskur East Jaintia Hills bad kaba dei ruh hapoh ka Reserve Forest jong ka Shnong. “Ngi la pynpaw ia ka jingpyrshah kaba jur pyrshah ia ka jingthmu ban wan seng ia ka karkhana coke bad ka MSPCB kala kular ban hiar jurip ia ka jaka hashuwa ba kan shim rai la, dei ban pynduh pyndam noh ne em iaka Consent of Establishment. U Mmeber Secretary u la pyntip ruh ba yn sa pynbeit iaka tarik ban leit jurip sha Wapungskur” la ong u Bah Postling. U Bah Postling u la ong baka Dorbar Shnong ka iengskhem haka nongrim ba kan nym ailad ia kiwei ba kin tuklar ia ki kam hapoh u pud u sam ka shnong. “Wat lada ngi duk, ngi kwah ia ka mariang kaba koit ka khiah ia ki briew jong ngi. Ngim donkam ia ka pisa namar ngim kwah ban iapein ia ka koit ka khiah bad ka bha ka miat ki briew jong ngi. Ngi iatip lut ba ka jingwan kine ki karkhana coke kin shu pynjakhlia tang ia ka mariang. Kumta, ngin iai bteng ban iada bad tyngkai ia ka Reserve Forest jong ka Shnong” u la ong.

Haba iadei bad kane u Member Secretary ka MSPCB u Bah GH Chyrmang u la ong ba ka Board kala ai ia ka CoE iaka Om Om Coke haba pynshong nongrim na ka NoC bala ai da ka Dorbar Shnong ka Mookhep. U Bah GH Chyrmang u la ong naka liang Board ha ryngkat bad baroh ki kynhun kan pynlong da ka jingjurip lang iaka jaka ban thikna la ka jaka kaba la ai ka ia dei ne em bad ki kot ki sla baka Company kala pynbiang bad lada kam ïahap, ka Board kan pynduh syndon ruh ia ka Consent To Establish (CTE).