Pyrshah ki paidhah ba iaid lait ka kompani ia ki kyndon ker sainar shah ha khappud India-Bangla

Ka jingthmu ka Company NBCC ban ker sainar shiah ha ki thain khappud India-Bangladesh kaba jngai kumba 5.600 km ha West Jaintia Hills Meghalaya ka la wanrah ka jingdkoh namar kam bud ia ki kyndon kaba pynlong ia ki nongshong shnong ban pyrshah.Kane ka jingpyrshah ki nongshong shnong ha ki thain khappud ka dei namar ki kynnoh ba ka NBCC kam bud katkum ki kyndon ban ker sainar shah.Ki nongshong shnong ki kynnoh ba ka jingker sainar shah khlem da bud ia ki kyndon kan pynduh ia ki jaka rep nalor kiwei ki jaka puta jong ki nongshong shnong ha ki thain khappud kynthup ka Wah ba iarap ban kyntiew ia ka kam jngohkai pyrthei. Na ka liang u MP ka Shillong u Dr Ricky AJ Syngkon ula pynshai ba ki paidbah kim pyrshah ia ka jingker sainar shah hynrei ki pyrshah namar ka Company NBCC kam bud ia ka kyndon kata ban ker sainar shah 150 Yard na u Zero Point.

Lah ban kdew ha ka 29 tarik Kyllalyngkot 2026, u MP ka Shillong Parliamentary Constituency, u la hiar dalade ban jurip ia ka thain Jaliakhola, Sankhat haduh Khamsing Padaswar kiba hap hapoh Amlarem Sub-Division, West Jaintia Hills. Ka jinghiar u MP sha kane ka thain ka long halor ka jingud ki paidbah ba ka jingker sainar shah (Fencing) bad ka jingshna surok khappud ka ktah ia ka roi ka par jong ka thain.Haba kren sha ki lad pathai khubor u MP ka Shillong ula ong, ba ki paidbah nongshong shnong ha ki thain khappud kim pyrshah ban ker sainar shah ha ki thain khappud ka Jylla bad ka Ri hynrei ki pyrshah namar ka Compani kam bud ia ki kyndon.U Dr Ricky u la ong ba lada ka Compani ka ker sainar shah palat ia ka bhah, ki paidbah kin duh ia ki lyngkha rep, ki kper kwai bad ka wah ba don ka lad ban kyntiew ia ka kam jngohkai pyrthei.“Ha ka jingleit jong nga ban iakren bad ki nongshong shnong ha ki thaiñ khappud nga la shem ruh ba don ka jingbym sngewthuh jingmut hapdeng ka Compani bad u Dolloi ka Elaka Satpator, kaba la nang pynsniew ia ka rukom trei ia kane ka kam ker sainar shah” la ong u Dr Ricky.

“Ngan sa kynduh ia ki bor District, u Dolloi, bad ki nongpyniaid ka NBCC ban sngap ia baroh arliang, khnang ba ngan lah ban pynsngew ryntih sha ka Sorkar India” u la bynrap.Haba iadei bad ka jinglong shngain ha ki thain khappud, u MP u la kdew ba ula thoh sha u Myntri ka tnat kam pohiing ka Sorkar Pdeng u Amit Shah ha kaba ula kyntu ba ka Sorkar India ka dei ban don ka jingiatreilang bad ki bor shnong.“Namar ki nongshong shnong ki dei kiba kham tip bha ia ka rung ka mih ki briew nabar, ka jingiatreilang hapdeng ki shnong, ka BSF bad ka Sorkar Jylla ka long kaba donkam eh ban khanglad ia ka jingrung beain” u la ong.