Rah ka Bakorshisha bad u Flourishing ia ka nam Miss & Mr Arliang Syiem

Kum shi bynta ban pynshlur bad ban ai iaka rynsan iaki samla donsap ba kin ioh ban pyni iaka sap ka phong ba ki don bad ruh kum shibynta ban wanrah iaka jingiajan bad ka jingiatylli hapoh ka dong ka thain Nongthliew baroh kawei, ka Snohktilang Society ha ryngkat ka jingiatreilang bad ka Hynniewtrep Achik National Movement Eastern West Khasi Hills District lem bad ka Synjuk Ki Nongsynshar Shnong Nongthliew Area haka 18 tarik u kyllalyngkot 2025 kala ioh ban pynlong iaka Samoi Lehkmen haka shnong Laitarted ha kaba u MLA ka Mairang Constituency uba dei haka juh ka por u Chairman ka Meghalaya State Planning Board ula wan ban long kum u kongsan haka jingiadonlang ki heh ophisar ka Eastern West Khasi Hills District.

U bah Metbah haba kren kum u Kongsan ula kyntu iaki samla ba kin ym klet iaka riam tynrai lajong watla ki nang kumno ban pyrthuh bud iaka jong kiwei bad ula pynshlur ruh iaki samla ba kin mih shakhmat haba ki ioh ia kum kine ki rynsan ba kin pynpaw iaka sap kaba ki don. Ki Nongpyniaid kila iathuh baka jingpynlong ia kane tamasa ka long ruh shibynta ban pynpaw pyrthei iaki 3 tylli ki jaka jngohkai kiba don ha kane ka thain kiba kynthup iaka Arliang Syiem, ka Kshaid Thup Thup bad ka Laitarted Lake.

Haka jingiakob Miss And Mr. Arliang Syiem Nongthliew Area ka samla Bakorshisha Pathaw bad u samla Flourishing Marbaniang kila ioh rah iaka nam lahduh katba iaka kyrdan kaba ar la ioh rah da ka samla Bakorshisha Kharthangmaw bad u samla Planbor Khyllait. Shuh shuh nalor ka jingiakob shad, jingiakob rwai la pynshogshit shuh shuh iaka samoi lehkmen ha kane sngi daka ki jingrwai naka samla Bateithymmai Nongrum bad ka jingtem DJ.