Sam Laptop u Conrad sha ki samla pule ka jylla

U Myntri Rangbah ka jylla u Conrad K. Sangma hynne ka sngi ula sam ia ki Laptop sha ki samla pule ka jylla ha ka jingsam ia ka khusnam Meghalaya IT Awards ha ka jingialang kaba la long ha Soso Tham Auditorium Shillong. Haba kren ha ka jingialang u Conrad K Sangma ula ai khublei ia ki 300 ngut tam ki samla pule kiba la wan shakhmat ha ki jingpule ha kaklas X bad XII ha u snem pule 2023-24 bad ula kyntu ia ki ba kidei ban long kiba tista bad kiba don akor ha ka jingim ka jongki. “Ka khusnam kadei ka jingai jingithuh jong ka sorkar ia ka jingjop ka jong phi. Kane kadei tang ka jingsdang jong ka jingiaid lynti ha ka jingim ka jong phi. Ngi ngeit skhem ba phin bteng ban trei shitom bad ban ai mynsiem ia kiwei ruh” la ong u Conrad.
Ula ong ba ka sorkar jylla ka iengkshem halor ka jingkular ban buh hakhmat ia ki samla ka jylla haba kaba iadei bad kino kino ki rai kiba ka shim bad ka sorkar jylla ka pynleit jingmut bha na ka bynta ki samla ka jylla. Ula ong, ba ka sorkar ka treikam da kaba iaid katkum ki scheme, ha kaba ki pynleit jingmut ha kaban pyntreikam ia ki prokram kum ka PMGSY, JJM bad Farmers Schemes, hynrei ha kane ka jingiaid lynti, la klet noh ia ka jingthmu jong kitei ki scheme ka long ban wanrah ia ka jingkylla ha ka jingim briew. U Myntri Rangbah ula ong, mynta ka sorkar kala sdang ban kynriah noh ha ka rukom pynleit jingmut ka jongka, na ka jingpyntreikam sha ka jingpynmih, da kaba buh ha khmat ia ka jingiohnong bad ia ki jingkylla kiba bha lyngba ki prokram kaba kila lah ban ai sha ki paidbah.
“Ngi kwah ban saindur ia ka sap ka phong jong ki samla, khnang ba ngin pynkhreh ia ki, ba kin lah ban iakhun ha ki rynsan ha ka kyrdan National ne International kynthup ia ka Olympics” ula ong bad ka bynrap ba kane ka sienjam kadei shibynta jong ka buit treikam jong ka sorkar ban kyntiew ia ka roi ka par bad ban pynkup bor ia ki samla ban lah pyndonkam ia ka sap kaba ki don bad ka sorkar kala buh ia u maw nongrim naka bynta ka lawei jong ka jylla bad ka ri.