Rah u Kitkupar Nongsiej T,1 lak na “Ka Sur Kynud S-3”

U samla Kitkupar Nongsiej, na shnong Kynshi ula rah ia ka nam lahduh ha ka jingiakop Grand Finale, Sur Kynud Season-3, ba la pynlong da ka Don Bosco Media Network & TV bad ula rah ia ka buskit ba 1 lak tyngka. Ki don 7 ngut ki samla bad ki heprit kiba la iakhun ha kane ka jingiakop final. Ki kyrteng jong kiwei pat kiba la rung ha ka Grand Finale ki long, Baphi Lyngdoh, Baphinrihun Mukhim, Rishannylla Hujoon, Reizel Dohling, Gwyneth Mawthoh bad Nestle R Syiemlieh. Kine ki la ioh ia ki certificate bad ki momento ban sah kynmaw ia ka jingshim bynta jong ki. Shwa ban sdang ia ka jingiakop, u Rev Phadar Ritonbor Kharkongor ula ai ka jingkren khublei ia baroh ki riewkhmat kiba la khot sngewbha kynthup ia ka Kong R M Kurbah, DC, East Khasi Hills, Padmashree Kong Patricia Mukhim, ki phadar, ki nongiashim bynta ha ka jingiakop, ia ki kmie ki kpa bad ia baroh kiba don kti ban pynlong ia kane ka jingiakop Sur Kynud. U la ai ruh ia ka jingduwai sdang ban kyrpad ia ki jingkyrkhu u Blei Trai Kynrad ha kane ka janmiet.

Ha ka jingkren lyngkot, ka Kong R M Kurbah ka la kyntu ia ki samla ban tur da ka jingshlur ban shim bynta sha kine ki lad ki lynti ba ki phadar Salesian ki ai ban pynroi bad pynkhraw ia ki sap ki phong jong phi. Ka la kdew ruh, da kaba ong, ban lait na ki jingriam kiba sniew ki ba paw ha ki dur babun jait, tur shaphrang ban shim bynta ha kum kine ki jingpynroi ia la ki sap ki phong.  Ka la iaroh ia ka jingtrei shitom bad jingaiti met bad mynsiem jong ki Phadar Salesian na ka bynta ban pynroi, ban kyntiew bad ban pynjanai ia ki sap jong ki samla ha kane ka juk.  Ka Padmashree Kong Patricia Mukhim ruh ka la ai ki kyntiew pynshlur ia ki samla bad ia ki kmie ki kpa ban iai pynshlur ia ki khun ha kum kine ki lympung pyni pyrthei ia la ki sap ki phong. U Rev Phadar Jeevan Lakra, Vice-Provincial ka seng Salesian ha ka jingkren lyngkot u la pynkynmaw ia ka jingieid bakyrpang jong u Don Bosco Bakhuid, u nongsdang ia ka seng Salesian ia ki samla. Dei une u riewkhuid uba la maitphang ban ai ki jinghikai bapura na ka bynta ki samla, kiba long ka lawei jong ki ri ka pyrthei. Ki matti jong u Don Bosco Bakhuid ki la phriang sha kylleng ki ri ka pyrthei da kawei ka sur, ban kyntiew ia ki samla na ka bynta ka lawei baphyrnai.

Ha kane ka janmiet, ka Don Bosco Media Network & TV ka la ai khusnam “Rangkynsai Ki Samla”  ia u samla Mario Pathaw uba la pynnoh bhah ha kiba bun ki phang ha ka imlang sahlang ha kane ka jylla. Katba u Rev Phadar Babu Stephen u  la ioh ia ka Cilia Memorial Award ba la pynsah nam ia u Phadar Cilia u nongsdang ia ka Don Bosco Youth Centre, Laitumkhrah. U Rev Phadar Michael Makri, Director, DBMN&TV u la ai ka jingkhublei pynwai ia baroh kiba la don kti ban pynlong ia ka Sur Kynud Season-3 kaba jop bad kaba kmen ha kane ka janmiet.