Rai ka Sorkar ban pynbeit ia ka thup bhah Pule Doctor

U Myntri ka Koit ka Khiah Bah Wailadmiki Shylla ula kular ia ka Khasi Students’ Union (KSU) ban pynbeit ia ki jingkynnoh leh bymhok ha ka jingsam ia ka bhah pule MBBS na ka bhah ka Sorkar Jylla. Ïa kane la pyntip da u President ka KSU u Samla Lambokstarwell Marngar hadien ka jingiakynduh ïa u Myntri ka tnat ka koit ka khiah u Bah Wailadmiki Shylla. Haba kren shaki lad pathai khubor u samla Lambok ula ong “U Myntri ka Koit ka Khiah ula pdiang ia ki jingai jingmut ka Seng bad ngi khmih lynti ia u ban pynbeit noh ia ka thup. Ngim kwah shuh ban nang ioh ia kum kine ki jingleh bymhok ha ki por ban wan”. U Samla Lambok ula ong ba ka KSU kala kdew ba ka rukom jied ia ki samla pule kam don satia ia ka jingjied kaba shai bad kat kum ka jing ioh marks, ha kaba ki samla pule ba ioh kham rit ka marks la pynrung ha ka open category katba ki samla pule Khasi ba ioh bun marks kila shah kyntait.

“Ngi la sakhi ia ka jingleh bym hok ha ka jingsam bhah pule manla u snem, wat hapdeng ki jingiai kyrpad jong ngi ban jied haba shit haba shai bad kat kum ka jingioh marks” ong u samla Lambok haba bynrap “Ka long kaba sngewkhia ba ki samla pule ba ioh duna marks kila shah pynrung ha ka open category, kaba pynduh lad ia ki samla pule Khasi kiba dei hok ban ioh ia ka bhah pule”. U president ka KSU ula ong ba ka seng ka dawa ban weng noh ia ka clause 9.6 na ka Standard Operating Procedure (SOP), kaba donkam ia ki samla pule ba kin jied hapdeng ka open category bad ka Scheduled Tribe (ST) category. “Ka Clause 9.6 ka dei ka bym iahap satia bad kaba pynduh lad ia ki samla pule ia ka hok ba ki dei ban ioh ha ka open category” ula ong kynnoh. “Ngi la kyntu ia ka Sorkar Jylla ban pynthikna ia ka jingjied ia ki samla pule haba shit haba shai, haba ban jur ba ki samla pule ba ioh bun marks, ki dei ban ioh nyngkong shuwa” ula ong.

U samla Lambok ula pyntip ba ka KSU kala buh jingkylli ruh halor ka jingpynrung lang ia ka Scheduled Caste ha ka State Reservation Policy, haba dawa ia ki sakhi ba pynrung lang ia ki. “Ka Sorkar kala pyrshang ban pynksan ia ka jingpynrung lang ia ki Scheduled Caste ha ka Reservation Policy, hynrei ngi donkam ia ka sakhi kaba khlain ban kyrshan ia kane ka jingkam, namar ym don ba tip ia kane. Ngin sa peit thuh ia kaei ka jubab bad ngin sa shim rai ia kaei kaba ngi dei ban leh shakhmat” ula ong. Naka liang u General Secretary ka KSU u Samla Donald V Thabah ula ong ba ka KSU kala dawa ba phra ngut ki samla pule Khasi kiba ioh bun marks ban ia ka Tanushka Chakravarty, ki dei ban rung lang ha ka waiting list jong ka open category. U samla Donald ula ong ba ka Clause 9.6 ka dei kaba pynkynrum kynram bha namar ka pynbor ia ki samla pule ba kin jied hapdeng ka jinglong ST bad ka open category, kaba lah ban pynduh noh ia ka hok jong ki.