Rai ka sorkar ban pyntreikam ia ka SBMGP na PHE sha ka tnad C&RD

Ka Kynhun Myntri hynne ka sngi ka la rai ban kynriah noh ka jingpyntreikam ia ka Swachh Bharat Mission Gramin Plus (SBMGP) na ka tnad Public Health Engineering (PHE) sha ka tnad Community and Rural Development (C&RD). Haba iakren bad ki nongthoh khubor, u Myntri Rangbah ka jylla u Conrad K Sangma ula ong, namar ki jingeh ba la mad da ka tnad PHE namar ka pyntreikam ruh ia ka Jal Jeevan Mission bad ka jingduna ki nongtrei ban pyntreikam ia ka SBMGP, kumta la rai ban pynkynriah ia ka jingpyntreikam ia ka SBMGP na ka tnad PHE sha ka tnad C&RD. Ula ong ki la shim ia katei ka rai namar ba ka tnad C&RD ka don ki nongtrei ha ki shnong ban pyntreikam ia katei ka projek bad kiba bun na ki jylla ha ka Ri ki la leh namar ka tnad C&RD ki sorkar jylla bapher ki don ki kor bad ki nongtrei ia ka SBMGP ha ka lynti kloi.

Ula bynrap ha ka jingialang ba dang shu dep bad ka Jal Shakti Ministry, u Myntri Sorkar pdeng, u Secretary bad ki ophisar ki la ai jingmut ia ka Sorkar Meghalaya ruh ban pynkynriah noh ia ka jingpyntreikam na ka PHE sha ka tnad C&RD. Ka Kynhun Myntri ka la mynjur ruh ia ka Ordinance ban kynthup ia ki jingpynkylla thymmai ia ka Goods and Services Tax Council (GSTC).

Haba iakren bad ki nongthoh khubor hadien ba la wai ka jingialang, u Myntri Rangbah ka Jylla u Conrad K Sangma ula ong, “Ba ki la don katto katne ki jingpynkylla ba la shim da ka GSTC ba mynta yn kynthup lang noh bad ia kane ka Ordinance ba la wanrah ban pyniaid ryntih ia kitei ki rai ba la shim da ka GSTC ha ka Meghalaya Goods and Services Tax Act, 2017”.