Rai sangeh treikam ki ASHA bym siew bai nong ka Sorkar Pdeng

Ki nongtrei ASHA hapoh ka shatri Meghalaya ASHA Workers’ Union (MAWU) hynne ka sngi kila pynbna ban sangeh treikam noh naduh 8 tarik Kyllalyngkot 2026.
Ia kane la pynbna daka Adviser jong ka MAWU ka Kong Sonny Kharjana bad kala iathuh ba ia kane ka rai ban sangeh treikam la shim haka jingialang jong ka Executive Committee kaba la long haka 11 tarik Nohprah 2025.
Haba kren shaki lad pathai khubor ka Kong Sonny kala iathuh ba ka daw baki nongtrei ASHA kin sangeh treikam kadei namar ka jingbym pyllait ka Sorkar Pdeng iaka bai nong (Incentives) jong ki palat 7000 ngut ki nongtrei ASHA ha Meghalaya.
Ka Kong Sonny kala iathuh ba naka liang ka MAWU kala dep ban ai por iaka Sorkar Jylla haduh 19 tarik Nohprah 2025 ban iakren bad ka Sorkar Pdeng halor ka jingslem ban pyllait iaka bai nong (Incentives).
“Kum ki nongialam ka MAWU ngi pynbna ba naduh 8 tarik Kyllalyngkot 2026 baroh ki nongtrei ASHA kin sangeh treikam tad haduh baka Sorkar Pdeng kan pyllait iaka bai nong (Incentives) jong baroh ki ASHA” la ong ka Kong Sonny.
Ka Adviser jong ka MAWU kala iathuh ba naka liang ka Sorkar Jylla ka pyllait naka por shaka por iaka bai nong jong ki ASHA hynrei kaba bai nong ba ki ASHA kim ioh kadei naka bhah jong ka Sorkar Pdeng.
Kala iathuh ba ki don ki nongtrei ASHA ki bym pat ioh iaka bai nong (Incentives) kaba sahteng naduh 5 haduh 10 bnai.
“Ka bai nong (Incentives) baki ASHA ki ioh kadei hapdeng T.150-T.200 bad ka jingslem ban pyllait iaka bai nong daki phew bnai ka buh jingeh iaki ASHA ban pynbit pynbiang haka iing” kala ong.