Rakhe ka Raj Bhavan ia ka sngi ioh Jylla ka Assam bad Nagaland

Ka Raj Bhavan, Shillong hynne ka sngi ka la pynlong ia ka jingrakhe ia ka sngi jong ka jingioh Jylla lajong ka Assam bad Nagaland. U Lat ka Jylla CH Vijayashankar ula plie ia kane ka jingialang ha ryngkat ka jingwan iashim bynta ki heh ophisar ka sorkar jylla, ki dkhot ka NCC, ki nongshah khot sngewbha bad la ioh ia ka jingkren maitphang halor kane ka jingrakhe na u Principal Secretary jong u Lat ka jylla u H.C.Chaudhary. U Lat ka jylla ula ai khublei ia ki paitbah jongka jylla Nagaland bad Assam ha kane ka sngi kaba kyrpang jong ka jingioh ia la ka jylla bad ia ka Asom Divas ruh kumjuh. Ula pynpaw ia ka jingkongsan jong ka jingdap 63 snem jong ka jylla Nagaland bad ka pynkynmaw ba ha ka 1 tarik u Nohprah 1963 kum ka jylla kaba 16 hapoh ka ri India bad ula ong ba ka jylla Nagaland ka don ia ka jinghiar pateng ki riewlum kaba long kaba jingsngewsarong, ka jingkhlain jong ka jingdon ka imlang sahlang ia ki jingling kiba kyrpang kaba don ia ka mynsiem jong ka jingiatylli kaba la saindur ia ka imlang sahlang bad iengskhem ha kaban pynneh pynsah ia ka kolshor bad iaka suk ka sain.

U Lat ula iaroh ruh ia kane ka jylla kaba don ia ki riti dustur, ki tamasa bad ki jingsahnam kyrpang kiba riewspah, kiba iai bteng ban ai mynsiem ia ka thain shatei lammihngi baroh kawei. Nalor kane ula ai khublei ruh halor ka Asom Divas bad ula ai burom ia ka Assam kaba don ia ka histori kaba jrong bad kaba donnam, kaba la pynwnadur da ka jingialam jongu Swargadeo Chaolung Sukapha, uba la wanpoi ha u snem 1228 bad buh ia u mawnongrim na ka bynta ha Hima Ahom bad ka jingling jingman ka imlang sahlang bad kam saiñ pyrthei ha ka thain. Ula pynpaw ruh ba ka Assam kadei ka khyrdop jong ka thain shatei lammihngi ka ri bad iaroh ia ka jinglong nongialam ka jongka ha ki lad pyniasoh ha ka leit ka wan, ka rep ka riang, ka jingpynneh pynsah ia ki jait jingim ki bapher bapher jong ka mei mariang bad ia ka kolshor kaba kyrpang.

U Lat ula ong ba ki kper slasha ha Assam, ka Wah Brahmaputra bad ki jingdonnam ha ka kolshor kum ka Bihu kila iai bteng ban ai mynsiem ia ka thain bad ia ka ri hi baroh kawei. U Lat ula ban jur halor ka jingiadei kaba skhem hapdeng jong ki jylla ka thain shatei lammihngi bad ka iengskhem ia ka jingshim lang ia ka jingkitkhlieh na ka bynta ka suk ka saiñ, ka roi ka par bad ka jingiatreilang bad ula pynpaw ia ka jingkyrmen ba ka jylla Nagaland bad Assam kin iai bteng ban leh ia ka bynta kaba khraw ha kaban pynurlong ia ka jingiohi jngai jong ka ri ka Viksit Bharat @2047, kaba la btin lynti da ka mynsiem jong ka ‘Ek Bharat, Shreshtha Bharat’.