Rakhe ka TNAI Civil Hospital Nongpoh ïa ka International Nurses Day

Ki Staff Nurse ka Nongpoh Civil Hospital hapoh ka lama jong ka Trained Nurses Association of India, Nongpoh Unit mynta ka sngi ki la ioh ban pynkut noh ia ka taiew lehkmen jong ka Nurses Week lyngba ka jingrakhe ia ka International Nurses Day 2025 halor ka phang pdeng Our Nurses, Our Future, Caring for Nurses Strengthen Economies ia kaba la pynlong hapoh ka Conference Hall jong ka Civil Hospital Nongpoh. Ha kane ka jingrakhe la wan ban ai mynsiem da ka Dr. D  Blah kaba dei ka Medical Superintendent ka Civil Hospital, ka Danilla Sangma, Nursing Superintendent, ki staff nurse kiba dei ki dkhot ka TNAI, Nongpoh Unit, ki dictor, ki khynnah pule Nurse napoh ka GNM Nursing School Pahamsyiem bad kiwei kiwei. Haba ai jingkren ha kane ka sngi, ka Dr. D Blah ka la ai jingiaroh bad ai khublei kyrpang ia baroh ki staff nurse ha kane ka sngi kaba kyrpang ka jong ki, kum ka jingai burom ia ki kam shakri paidbah jong ki kaba janai bad kaba khlem da tieng ne riej ia kino kino ki jingeh ba ki hap ban mad ha ki kam shakri paidbah jong ki.

Ka la ong ruh, ba ka kam shakri kum ki Nurse ka long shisha kaba kongsan bad kaba kyrpang ha ki jaka sumar ia ki nongpang, kane ka kam ymtang ba ki nurse ki iarap ia ki doctor hynrei ki aiti dalade ban sumar ia ki nongpang tad haduh ba kin da koit bad ioh mih na ki jaka sumar. “Ki Nurse ki long shisha kita ki paia ba skhem ne ki budlum jong ki jaka sumar paidbah”, ong ka Dr. Blah da kaba kitbok kitrwiang ruh ia baroh ki nurse ba kin nang lah ban bteng ia ka jingshakri kaba bha jong ki, ha ryngkat ka jingtreishitom, ka jingshemphang ha ryngkat ka koit ka khiah jong ki.

Ha kane ka sngi hashwa ban sdang ia ka jingrakhe la ioh ban pyndon burom bad kynmaw ia ki matti ba la buh da ka Florence Nightingale ka nongseng ia ka Modern Nursing da kaba plie ia ka dur sahnam jong ka ha ryngkat ka jingthang ia ka sharak jong ka jingrakhe.Na ka liang ka TNAI Nongpoh Unit, ki la sam ruh ia ki khusnam sha ki nongiashimbynta ha ki programme ialehkai sport bapher bapher ba la pynlong ha kane ka taiew lehkmen jong ka International Nurses Day.