Rakhe ka Tympang Club ia ka jingdap 125 snem, T.10 lak kular u bah W.Shylla bad pynbha madan

Ka Tympang Club Jowai kaba dei ka Club banyngkong ha sor Jowai ba la seng naduh u snem 1901 ka la rakhe ia ka jingdap 125 snem ha madan Tympang Club, kaba long ka jaka pdeng ha Jowai ba ki ophis sorkar kum ka ophis u Deputy Commissioner, ka ophis JHADC ki don ha kane ka jaka.
Ha kane ka sngi u myntri ka tnat Sport, u Wailadmiki Shylla ba long u MLA ka thaiñ u long kum u kongsan ban plie pyrda ia kane ka jinglehkmen, u Thombor Shiwat CEM JHADC kum u symbud kongsan ha ka jingdonlang u Moonlight Pariat MDC JHADC, ka C.Lyngdoh Dy SP WJH, ki waheh shnong na ki shnong bapher ka Jowai, kiba shah khot sngewbha bad kiwei.
U bah Wailadmiki Shylla haba kren u ai khublei bad iaroh ia baroh ki dkhot ka club kiba don bynta naduh ba sdang bad kiba mynta namar ka jingiaid lynti ia u mawmer ba 125 snem kam dei kaba suk.
Haba kren ula pynsngew ruh ia ki kam ki project kiba ula lah ban trei pyndep hadien ba shah jied kum u MLA, kynthup naduh ki project ba sahteng da ki phew snem bad ki project thymmai.
Ula pynsngew ruh ia kiwei pat ki kam pynroi kiba dang iaid shakhmat ka jingpyntrei nalor kiba la mang thymmai hapoh ka Jowai constituency.
U pyntip na ka bynta ka Kiang Nangbah Stadium Jowai la dep mang 6 klur tam ban shna ki sitting galary, nangta ka 17 klur tam ban shna artificial athletic track nalor ban siang thymmai u artificial turf bad shna iaka VIP galary katkum ka juk mynta.
Nangta ki skhim pynroi hapoh ka sor Jowai lyngba ka tnat urban mynta la lah ban pynkiew bun shah shaka 5 klur shisnem na kaba juh ioh tang 30,40 lak.
Nangta shi bynta jong kane ka jinglehkmen 125 snem ka Tympang Club, u Wailadmiki Shylla ula kular ban ai jingiarap 10 lak tyngka, ha kajuh ka por ruh u kular ban shna pynbha iaka madan ka Tympang Club bad ban buh bor ding sawdong ka madan khnang ban ioh lehkai haka por mynmiet ruh.
Shwa kane la ioh ka jingkren pynshai halor ka khana ka Tympang Club naka R. Lyngdoh (Retd. IAS), ba kumno la ai kyrteng pat da ka Ïawmusiang, nalor kiwei kiba kren.
La don ruh ka jingialang pynkup burom iaki nongialam barim ka club kiba la khlad ha hall jong ka club ha kaba la wan shimti da kiba haiing hasem jongki.
Bad la pynshong shit shuh shuh ia kane ka jinglehkmen da ki jingshad jingrwai ba la shim bynta da ki khun ka club, ka Seinraij Jowai bad kiwei.