Sam khusnam ka sorkar ia ki VO ban ai mynsiem ban treikam bha

U Myntri Rangbah ka Jylla u Conrad K. Sangma ryngkat bad u Myntri uba khmih ia ka Rural Development u Bah Sosthenes Sohtun, hynne ka sngi ki la plie ia ka 6th Meghalaya Saras Aajeevika Fair 2025 kaba la pynlong ha Soso Tham Auditorium. Ha kane ka jingialang ki la don palat 60 tylli ki SHG bad ki nongsengkam ha Nongkyndong, kynthup ia ki nongiashim bynta na bar ka Meghalaya, ki la pyninam ia ki mar ki mata kiba ki la pynmih. La pynkup burom bad ai khusnam ia ki Village Organisation kiba kyrshan ia ki prokram jong ka ICDS ia kaba ym shym la don ia ki Aganwadi Centre bad VO kiba la tei ruh ia ki Transit Homes na ka bynta ki longkmie kiba pun khun bad la ai sertiphiket ia ki 15 ngut ki Volunteer kiba la trei met bad mynsiem ha kaba iadei bad ka jingiakob jong ka Har Ghar Tiiranga Campaign.

Nalor kane, la sam ruh ia ki 15 tylli ki Micro ATMS da ka jingiatreilang bad ka Meghalaya Rural Bank, ka jingaiti ia ka ram lyngba ka Cheque sha ki SHGS da kaba iatreilang bad ka MRB, ka jingsam ia ki Cold Chain Boxes sha ki Pashu Sakhis, ka jingsdang pyntreikam ha ka jylla ia ka Nayi Chetna, ka National Gender Equality and Women Empowerment bad ka jingsdang ia ki 50 tylli ki Integrated Farming Clusters kaba T.20 Klur, Lumlang Marketing Federation bad ka 6th Saras Aajeevilka Fair 2025. Haba kren ha ka jingialang u Myntri Rangbah ula ong, ba ka jingiakhih jong ki SHG kam dei eh tang halor ka jingkiew ka ioh ka kot, ka dei halor ki longkmie kiba don nadien ka jong ka, kiba iai shah bad ki lad kaba la thaw hi da ma ki bad kumjuh na ka bynta kiwei ruh.Ula pynpaw, ba ka sorkar ka donkam ban iaid shakhmat ym tang halor ka jingpyntyreikam ia ki skhim sorkar hynrei ban phaikhmat ruh halor ka bam ka dih kaba tei, ka jingdon ia ka jingpynwandur ia ka longiing longsem, ka kamai kajih bad ka jingpynkup bor ia ki longkmie, ki sienjam kiban iarap ia ki SHG ban kylla long kum ki jaka kiba khlain ha ki shnong ki thaw.

U Conrad Sangma ula pyntip ba ka Meghalaya mynta kala wan baar ha ka jingkiew ha ka ioh ka kot hapoh ka ri bad ula ai nguh ia kane ka jingkiew ba kam dei satia tang da ka jingkynshew tyngka ne ka jingpynlut ka sorkar hynrei ban kyntiew ia ki jingsengkam sengjam ha ki shnong ki thaw. U Myntri Rangbah ula ong, ba ka jingnoh synniang ki SHG ka long kaba don jingmut bha ia ka ioh ka kot jong ka Meghalaya bad kane kadei namar ka jingdon ia ki jaka treikam kiba khlain, kila kylla long kum ki bor kiba la wanrah ia ka jingkylla kaba khraw.