Sam syrnod u Bah Prestone ia 83 ngut ki Home Guards ba tbit tam

U Symbud Myntri Rangbah ka Jylla u Bah Prestone Tynsong uba long ruh u MLA ka Pynursla hynne ka sngi, ula aiti ia ki syrnod sha ki 83 ngut ki samla na ka thain Langkyrdem kiba la pyndep ia ka jinghikai ban long kum ki Home Gurads Volunteers ha ka jingialang ha madan ka shnong Laitlyting. Kine ki 83 ngut ki samla shynrang bad kynthei ki la pyndep ia ka jinghikai ba ia dei bad ka Arms Drill, Foot Drill, Civil Defence Training, Disaster Management bad ia ka Firing ne jinghikai ban siat ba la pynlong ha 1st MLP Batallion, Mawlai Mawiong. U Symbud Myntri Rangbah ka Jylla u Bah Prestone Tynsong, mar ia poi ha madan ula leit jurip ia kine ki Home Guards Volunteers ba la pyndep ia ka jinghikai bad u la Salute ia ki samla kynthei bad shynrang ba la iashim bynta ha ka jingiaid parade.

U Joint Director jong ka Home Guards u Bah B Mukhim ula ong, ba kane ka kynhun ka dei ba tbit bha, kaba la trei met bad mynsiem bad kaba don ia ka akor bad ba hap ban ai jingiaroh ia ka jingbit ki samla ban shah pynrung ha kano kano ka kam ban shakri ia ka ri bad jaidbynriew. Ula iathuh lah bun snem ki Home Guards ba leit trei ha ka tnad Traffic ne Fire and Emergency Service ki la mad ia ka jingeh namar ka jingslem ban ioh ia ka tulop, hynrei dei lyngba ka jingshimkhia bad jingprat lynti u Symbud Myntri Rangbah ka Jylla uba la lum kyrkieh ia ka jingialang ki heh pulit bad Home Guards ban pynbeit ia katei ka jingeh bad mynta um don shuh wat tang uwei u Home Guards bym ioh ia ka tulop. Haba kren ha ka jingialang u Bah Prestone ula iaroh ia kine ki 83 ngut ki samla ba la pyndep ia ka jinghikai bad ula pynpaw ka jingsngew kmen ban tip ba kane ka dei kawei na ki kynhun ba tbit tam ryngkat ka akor ba bha.

“Nga kyrmen skhem ba kin sa shah pynrung kam ha kylleng sawdong ka jylla ban ai jingshakri ba bha ha kano kano ka jaka ba phi trei, rah ia ka nam jong ka Pynursla Constituency bad ia ka Raid Langkyrdem khnang ba phin long kiba iwbih bad ba phin pyniwbih lang ia kiwei ki dong bad ki thain ka Meghalaya” la ong u Bah Prestone. Ula ong ba kane ka jingai jinghiaki kadei tang ka jingsdang bad u kyrmen skhem ba kane ka thain kan dang lah ban pynmih shuh shuh ia ki Volunteers kiban noh synniang ia ka jylla lyngba ka kam ai jingshakri ka jongki.