Sam work order u MLA sha ki 16 shnong ban shna Anganwadi Centre

U MLA ka 2-Jowai Constituency u Wailadmiki Shylla mynta ka sngi ula sam work order  shaki 16 tylli ki shnong ba hap hapoh ka Thadlaskeiñ C&RD Block naka bynta ban shna iaki Anganwadi Centre kaba hap hapoh ka  phase X. Ha ka jingialang sam work order ba pyniaid da u Dr.H.Niang BDO ka Thadlaskeiñ C&RD Block  ha hall BNRGSK Thadlaskeiñ C&RD Block, la ioh ka jingkren pdiang naka Violet Rose Talang Junior Rural Development Officer, Thadlaskeiñ Block, ka jingkren pynshai halor ka anganwadi centre naka CDPO, ICDS Thadlaskeiñ ka D.Iakai.  Ka kong D.Iakai haba kren pynshai halor ka anganwadi centre, ka ong mynshwa la juh  tip kum ka iing ai bam shana shaki khynnah tangba mynta kala pher namar haka la ioh bunjait ki jingshakri da kaba don ruh arngut ki nangtrei.

Kawei ka anganwadi worker ka ban peit iaka imlang sahlang bad ka koit ka khiah ki khynnah haba iadei bad ka jingkhia ka jingbiang bam naduh ba kha haduh ban  dap 6 snem ka rta, kumjuh ruh iaki longkmie armet, ki khynnah naduh 14 haduh 16 snem ka rta, katba ka anganwadi helper pat dei ka nongpynkhuid pynpliah iaka anganwadi centre. U Wailadmiki Shylla haba kren kum u kongsan u kyntu iaki shnong ki thaw ban sngew trai iaki jingai ka sorkar, da ka ban iatreilang haka jingiadei ban pyniaid beit pyniaid  ryntih iaki anganwadi centre khnang ba kano kano ka jingai ka sorkar kan long kaba pynmyntoi.

Kumba kane dei ka ïing ban pynbha pynmiat iaki khun ki kti kumjuh iaka lawei ka shnong ka thaw, u kyntu ban buddien iaka jinglong jingman bad rukom treikam ki anganwadi centre khnang ban tip pynbit pynbiang iaki jingduna. Bad kumba ka Jylla Meghalaya dei kaba kheiñ kor bha iaki longkmie, u khmih lynti ba daka jingshimkhia lang ki shnong ki thaw  kumjuh kiba trei  haki Anganwadi Centre yn lah ban pynduna ka jingkhlad ki longkmie haka por ba kha khyllung.