Angnud ka Sorkar ban pyndep ki Project Smart City ha ka por ba la buh

Ka Sorkar Jylla ka don iaka thong ban pyndep noh ia baroh ki jaka ieng kali lane ki Parking Lot ha kylleng ka Nongbah Shillong ha u bnai Kyllalyngkot 2026. Kine ki jaka ieng kali lane ki Parking Lot ki hap hapoh ka Shillong Smart City project ia kaba ka Sorkar Jylla lyngba ka tnat Urban Affairs haduh mynta ka dang pyntrei. Ki don ym duna 16-17 tylli ki project hapoh ka Shillong Smart City, kiba kynthup naduh ki Shopping Mall, ki Parking Lot, ki Smart Road bad ki nala pyntuid um (Aquaduct) nalor kiwei kiwei de.

Naka liang u Symbud Myntri Rangbah ba khmih iaka tnat Urban Affairs u Bah Sniawbhalang Dhar ula pyntip ba baroh ki projek hapoh ka Smart City ki dang don haka jingpyntrei mynta, ha kaba la buh ia ki por bapher bapher na ka bynta kawei pa kawei ka projek.“Ka Sorkar ka dang iakren mano ban pyniaid ia ki jaka ieng kali, da ka jingthmu ban iatreilang bad ki Rangbah Shnong ha ki jaka bym dei jong ka Municipal bad daka tnat Municipal ha ki jaka jong ka Municipal,” u la ong. U Symbud Myntri u la pyntip ba ka projek kaba dei ka jaka ieng kali kaba don hajan ka Additional Secretariat ka la jan dep.

Haba kylli, u Symbud Myntri u la ong ba iaka Street Parking Policy la khmih lynti ban treikam pura ha kaba kut jong u snem 2025. U Bah Sniawbhalang u la kdew ba watla ki lah ban don ki jingeh ha kaba sdang, hynrei mynta ki jingpyntrei iaki projek ki iaid bha.