Sangeh noh kam pynroi ha thaiñ Langpih, pynbeit shwa ia u pud, dawa ki sengbhalang

Hadien ba la mih ka huri huri na ka jingthmu jong ka sorkar Assam ban pynheh ia ka surok na Assam haduh Langpih bad Mawsikar, na ka liang ki sengbhalang ka thaiñ Rimuliang ba kynthup ia ka KSU Rimuliang Circle, FKJGP Rimuliang Circle lem bad ka shnong Mawsikar ki la leit ban iakynduh ia u Deputy Commissioner ka West Khasi Hills District ban dawa pynsangeh ia ka jingpyntrei ia katei ka surok katba ka sorkar kam pat lah ban pynbeit ia u pud u sam hapdeng ki ar jylla.

Haba kren bad ki nongthoh khubor hadien ka jingïakynduh ia u DC, na ka liang u Bah T. Nonglang, sordar ka shnong Mawsikar, u la ong ba ‘horkit hordang nangne shakhmat ngin ym shah shuh ia ki kam pynroi jong ka Assam ba kin dang pyntrei hapoh ka shnong jong ngi bad ngin ialeh ia kane haduh ba kut khlem jingkynran dien’.Katba na ka liang u Bah Biangboy Sangriang, President ka KSU Rimuliang Circle u la pynpaw ba ka Assam na ka por sha ka por ka ju leh ia ki kam ban skud jubor ia ki jaka khappud ha ka thain Langpih wat hapdeng ka jingpyrshah jong ki nongshong shnong. U la ong ba kum ka seng kim kwah ia kino kino ki kam pynroi katba ka sorkar kam pat lah ban pynbeit ia u pud u sam bad lada dei ban wanrah ruh kan dei beit tang kiba wan napoh ka jylla Meghalaya.

Na ka liang u bah Serbilin Lyngdoh, President FKJGP Rimuliang Circle pat u la pynpaw ba kane ka dei ka jaka ba ki paidbah ki la thrang ba ia ka jingpynbeit ia u pud u sam dei ban pyndep noh hynrei haduh mynta ka dang sahteng bad na ka liang ka Assam ruh ka bteng ban leh ia ki kam kyntur pud bad ia kaba ngim lah ban pdiang. “Lada phi ai ki kam pynroi ne ki scheme baheh katno katno ruh, ngim kwah ban shah pynhap sha Assam bad ka seng kan iai pyrshah lada dei ha madan ne lyngba ki jingiakhih ruh ban dawa ba ka sorkar kan pynbeit noh ia u pud u sam bad ia ki kam pynroi pat ngin sa ia peit hadien” ong u Bah Serbilin.