Ai jinghikai ki bor District, pynshlur ia ki samla ban rung shipai BSF

Kum shibynta ban pynshlur ia ki samla riewlum ban rung ha ka kam shipai hynne ka sngi, ki bor pyniaid district jong ka East Khasi Hills ki la pynlong ia ka Career Guidance bad Counselling programme ha Soso Tham Auditorium, Shillong. Ka jingthmu jong kane ka prokram ka dei kum shibynta jong ka Open Recruitment Rally na ka bynta ki samla riewlum jong ka jylla Meghalaya da kaba ai ia ki jingtip kiba bniah shaphang ka rukom pynrungkam ia ki samla ha ka Border Security Force (BSF) bad la pynlong katkum ka jingbthah jong ka Ministry of Home Affairs (MHA) jongka Sorkar India, ban pynrungkam ha ki 300 tylli ki kam kiba lait ha ka kyrdan Constable (General Duty) na ka bynta ki samla riewlum ka jylla.

Ia kane ka prokram la plie da u Bah S. Warjri, MCS Additional Deputy Commissioner jong ka East Khasi Hills, u Commandant Establishment BSF, Frontier Headquarter Shillong u Rajiv Kumar Sharma, u Lt Colonel uba la shongthait na ka kam u Bah Sebastian Marbaniang u Zila Sainik Welfare Officer, Shillong, Lt. Colonel ba la shongthait na ka kam u Bah Aibanjop Suting u Zila Sainik Welfare Officer ka Tura. Haba kren u Bah S. Warjri, ula ban jur ia ka jingkongsan ka prokram bad ula pynpaw ba ka bor pyniaid district ka thmu ban ai ia ka rynsan ia ki samla kiba don ia ka jingthrang ban pynkhreh na ka bynta ban ioh rung kam bad kan ai jinghikai ei ia ki samla ban pynkhreh ia ka jingthoh eksamin kiba la pyndep ia ka Physical Efficiency Test (PET). U Rajiv Kumar Sharma, ula pyntip ki don baroh 300 tylli ki kam kiba lait kiba la bhah na ka bynta ka jylla Meghalaya.

Ha ka jylla baroh kawei, ki don 191 tylli ki kam kiba lait na ka bynta ki shynrnag bad 34 ngut na ka bynta ki kynthei. Ha ki Border Districts ki don 64 tylli ki kam kiba lait na ka bynta ki shynrnag bad 11 ngut ia ki kynthei. Kumta ki kam kiba lait baroh ki long 300 kata 255 ngut ia ki shynrang bad 45 na ka bynta ki kynthei ha Meghalaya.Kiba lah ban iakhun ban ioh kam ki dei ban long ki nongshong shnong ka ri India bad ka rta ka dei ban long 18 haduh 28 snem haduh ka 1 tarik u Nailar 2025, kaba kynthup ban pynjynsur 5 snem ia ka rta. Kane ka mut ba ki kyrtong ki dei ban long kiba la kha hapdeng ka 2 tarik u Nailar bad 1 tarik u Nailar 2007. Ki nongaplai ki dei ruh ban pyndep ia ka matrik ne klas X na ka Board ne University.