Ka Sibsingh Memorial Govt HSS ka la jan duh ia ka Commerce Stream (Day Shift) bad Arts Stream (Morning Shift) namar ka khlem paw ha ka list ban shah kynthup ha ka mang jong ka sorkar ban kyntiew shuh shuh ia ka seat na ka bynta ki khynnah skul kiba pule ha ka Arts bad Commerce Stream. Ïa kane la pynpaw da ki nongpyniaid jong ka skul Sibsingh kiba la shaiong ngain namar wat hadien ba la bthah ia ki ban phah ia ka jingtyrwa hynrei ynda la pynmih ia ka list pat ka Sibsingh kam shym la don.
Kane ka la pynlong ia ka Principal kong D. Hoojon ban telephone sha u MLA bad hadien ka jingiakren jong u MLA ka Nongstoin Bah Gabriel Wahlang ryngkat bad u Myntri Rangbah u Conrad K Sangma, ia kane ka kam la lah ban pynurlong bad mynta ka sngi ka 3 tarik u Jylliew 2025, na ka liang jong ka skul ka la ioh ban plie paidbah noh ia ka Class XI Commerce Stream ( Day Shift) bad Arts Stream ( Morning Shift) ha kaba u Bah Gabriel Wahlang u la long kum u kongsan ha ryngkat ka jingiadonlang u Bah H.K. Thabah, Additional Deputy Commissioner ka West Khasi Hills, ka Kong D. Hoojon, In-Charge Principal jong ka Sibsingh Memorial Govt. HSS kaba la pynïaid ruh ïa ka jingïalang, ki nonghikai jong ka skul, ki khynnah skul, ki kmie ki kpa bad kiwei pat ki nongïashim bynta.
Haba ai jingkren ha kane ka sngi, u MLA Bah Gabriel Wahlang u la ai ka jingïaroh ïa u Myntri Rangbah ka jylla halor ka jingshahshkor jongu ïa ka jingkyrpad ban pynioh ia ka Commerce bad Arts Stream ha kane ka skul. U la ong, “Ha ki snem ba mynshwa ym pat don ïa ka Commerce stream bad ka Arts stream mynstep, hynrei hadien ba ka skul ka la phah ia ka jingtyrwa bad hadien ba nga la iakren bad u Myntri Rangbah, u la shimkhia bad mynta ngi la lah ban plie paidbah.” U la kyntu ruh ïa ki samla pule ba kin trei shitom bad pynkhreh bha na ka bynta ban poi sha la ki thong ha ka lawei. Ha katei ka sngi la ioh ruh ia ka jingkren na u Addl. DC ka WKH Bah H.K Thabah, Kong Y. Nongkynrih, Assistant Lecturer bad kiwei kiwei.