Sei ka Northern Ri Bhoi Kolej 25 ngut ki soh nyngkong ha ka BA

Ka long shisha ka sngi kaba ai jingkmen bad ai mynsiem shikat dei ia ki bor pyniaid ka Northern Ri Bhoi College kaba dei ka Kolej kaba dang shu sdang shen ha u snem 2021 ha kaba mynta kane ka Kolej ka pynmih 25 ngut ki samla pule kiba la pass ia ka Bachelor of Arts (Graduation) jong u snem 2024 ia kine ki samla la pynkup burom mynta ka sngi ha ka jingpynhap pyrda noh ia ka taïew lehkmen jong ki samla pule kane ka Kolej. La wan ban don bynta lang ha kane ka sngi kmen jong ka Kolej, da u Bah Mayral Born Syiem, MLA ka Nongpoh u ba dei ruh u Chairman katei ka Kolej, u EC Benny Principal ka Ri-Bhoi College, Nongpoh, Bah Hesting Syiem Principal ka Nongtluh Higher Secondary School, ki riew rangbah, ki nonghikai lem bad ki samla pule jong katei ka College.

Haba ai jingkren u Bah Mayral Born Syiem, ula ai ka jingiaroh ia baroh ki 25 ngut ki samla pule kiba lah ban pass bha ha kane ka snem kumjuh ia ki nonghikai ba watla ki la hap ban mad shibun ki jingeh ha kaba ia dei bad ki jingdonkam ha kane ka Kolej kaba dang shu sdang thymmai ha u snem 2021 ban ai jingshakri ban pynphyrnai ia ka jingnang jingstad ha ka thaiñ Umden hi baroh kawei hynrei khlem da duh mynsiem ki la trei minot ban pass ia kane ka eksam kaba dei ka eksam kaba nyngkong eh na kane ka kolej. “Ka long shisha ka jingkmen kaba khraw ia u riew khraw ka Ri Bhoi District u Dr. D.D Lapang u ba angnud ban seng ia kum kane ka Kolej ha ka thaiñ Umden ban shakri ia ki samla pule khamtam kito kiba wan na ki longiing baduk, bad ka jingmih jong kine ki soh nyngkong na kane ka Kolej kan ai mynsiem shikatdei ia kiwei ki samla pule”, ong u Bah Mayral Born Syiem.

U la pynpaw ruh, ia ka jingsngew diaw ruh ba kum ka Kolej ka dang don hapdeng shibun ki jingduna kata naduh ka jingpynbiang ia ka tulop ki nonghikai, ka iing building kaba paka namar haduh mynta kane ka Kolej ka dang pyndonkam da ki kamra class barim jong ka Nongtluh Higher Secondary School, hynrei khlem da duh mynsiem kum u dkhot kane ka Kolej un nang iai treishitom ban pynurlong ia ki jingdonkam kiba bun, da kaba kyntu ia ki samla pule ban iai treishitom khlem da randien ban kiew ha ka jingim jong ki. La pynphuh pynphieng ruh ia kane ka program bad ka jingpynkut ia ka taïew lehkmen ki samla pule da ki jingrwai jingshad ba la shimbynta da ki samla pule.