Seisoh ka jingpyntreikam ia ka jingstad ki nong Europe ha SWKHD

Ka Picasso Pupils An Art Society ha ka jingiatreilang bad ka Emage Archiecture Studio, Slovakia, Europe, ka Meghalayan Age Ltd, ka Saitsnat Multipurpose Cooperative Society bad ka tnat Tourism ka sorkar Meghalaya mynta ka 20 tarik u Jymmang ki la pynlong ia ka prokram ‘Pine Home Archietecture Launch’ kum ka dak jong ka jingkmen halor ka jingseisoh jong ka jingpyntreikam ia ka jingstad bad jingshemphang ki nong Europe ha kaba tei ia ka ‘Pine Home project’ ha ka shnong Mawlangwir, South West Khasi Hills District, kaba long ka jingtei baphylla bad banyngkong eh ha Meghalaya.

Ia kane ka Pine Home Project la bei tyngka da ka Sorkar Jylla lyngba ka Meghalayan Age Ltd. ha ka jinglut baroh kaba T.4 klur tyngka tam, bad la tei ia kane ka īing da ki rangbah ba la tbit napoh ka District katba ia ki dur ki dar jong ka jingshna (architectural design) la wanrah da ki ‘engineer’ napoh ka Ri Slovakia, Europe, kiba la ju mlien ban shna ia kum kine ki jait iing.

Haba kren ha ki lad pathai khubor, ka Jana Bednarova, Project Manager and Coordinator jong ka Picasso Pupils – An Art Society, ka la iathuh ba ia kane kane ka ïing la tei tang da ki tiar kiba ngi lah ban ioh na ki shnong ki thaw, kum ki dieng ki siej, skum kba, ka dew byrtha, bad kiwei kiwei ba la pynwan dur naduh nabar shaduh shapoh jong ka iing ha ryngkat ka jingpyndonkam malu mala da ka dewbilat.

Ka Jana Bednarova ka la pyntip ruh ba kane ka prokram mynta ka sngi kam dei ka jingplie ïa kane ka projek, hynrei ka dei ka jingrakhe ïa u mawjam jong ka jingjop ba ki la lah ban pyndep ïa baroh ki bynta jong ka jingtei watla ki dang don ki bynta ba rit kiba dang dei ban pyndep ïa ka jingpynwandur shabar bad kumjuh shapoh.

“Ngi la jop ïa ka jingthmu jong ngi ba ïa ki buit stad kiba la wanrah na Europe, lah ban pyntreikam da ki tiar ki tar kiba don ha kane ka thaiñ, bad da ki briew kiba na kane ka thaiñ,” la ong ka Bednarova.

Ka la ong ruh ba shwa ban plie paidbah ïa kane ka projek, donkam ban ai ka jinghikai ia ki briew kane ka thaiñ ban shimti ïa kane ka projek ym tang kum ka ïing jngohkai, ka jaka bam ne ka café, namar ïa kane ka projek la shna kum ka jaka ïalang ha kaba lah ban pynlong ïa ki prokram bapher bapher na ka bynta ki samla bad ka imlang sahlang. Ka la pynpaw ruh ïa ka jingkyrmen ba shen kin sa ioh pyndep noh lut khoit ia kane ka jingtei na ka bynta ka jingmyntoi ki paitbah ka District bad khamtam eh ban kyntiew ia ki kam jngohkai pyrthei hapoh South West Khasi Hills District.

Ha kane ka prokram la iadonlang ruh u Bah Micheal Mawroh, Superintending Engineer ka Directorate of Tourism kum u kongsan ha ryngkat ka jingsynranlang u Bah Batkupar Lyngdoh, Assistant Executive Engineer ka tnat Tourism, u Marek Guga bad u Jozef Fugger kiba dei ki Resource Engineer na Slovakia, bad kiwei kiwei de ki riew rangbah.