Shah dain kuna ki sahep ba pynkhein dih sikret

Ki bor District ka East Khasi Hills hynne ha kine ki lai bnai ki la sdang ban pyntreikam ia ka Cigarettes and Other Tobacco Products Act (COPTA), 2003. Ka jingpyntreikam ia kane ka ain COPTA ka la iaid mynta ha man ki Police Station, Outpost bad Beat House hapoh ka District. Ha kine ki lai bnai ki pulit ki la ai haduh 1178 tylli ki challan bad ioh lum kuna haduh T.99,280 na ki nongpyn khein ia ka ain. Ka jingpyntreikam iaka COPTA 2003, ka dei ban mana bad dain kuna ia ki ba dih sikret/duma ha ki jaka paidbah bad ka jingdie ia ki sikret/duma hajan ki jaka pule.

Ha ka jingkhynra ia kiba pynkhein ain, ki Pulit ka East Khasi Hills na Contonment Beat House bad Lumdiengjri Police Station kila bat ia bun ngut eh ki nongpynkhein ain namar ka jingdih sikren ha jaka paidbah bad ruh ka jingdie ia ki sikret/duma hajan ki jaka pule.Kane ka jingkhynra ka long shibynta jong ka National Tobacco Control Programme (NTPC), kaba la ialam da ka Tnad ka Koit ka Khiah bad ka National Health Mission (NHM) ka Jylla.

Ki bor Sorkar kila ban jur ba kane ka jingkhynra kam dei tang ka jingpynshitom ia ki nongpynkhein ain-ka thmu ban pynkylla ia ka jinglong ki briew bad ban iada ia ki Khunlung Khynnah, ki riew rangbah bala noh rta, bad ki briew ki bym dih sikret na ki jingma haba ioh ring ia ka tdem sikret.Ki Ophisar ka Tnad ka Koit ka Khiah kila pynpaw ba ka jingdih sikret ka dei ka jingma kaba khraw bha ia ka koit ka khiah ki paidbah, kaba pynioh haduh 40% ki jingpang bampong (cancer) ba laiphew jait bad 90% ka jingpang bampong ha ka shyntur. Kane ka sienjam kala ioh ia ka jingkyrshan kaba khlain na ki paidbah bad la iaroh ruh kum ka sienjam ha ka por kaba biang eh ban iada ia ka koit ka khiah ha ka imlang sahlang.